इटहरी : इटहरीमा लागूऔषध नाइट्राजेपाम ट्याब्लेटसहित दुई जना पक्राउ परेका छन् ।
इटहरी उपमहानगरपालिका–२० तरहरा पानीपिया जंगलस्थित कोशी लोकमार्गमा संयुक्त प्रहरी टोलीले चेकजाँचका क्रममा उनीहरूलाई पक्राउ गरेको हो ।
प्रहरी चौकी तरहरा, ट्राफिक प्रहरी पोस्ट तरहरा र कोशी प्रदेश प्रहरी कार्यालय धरानको केनाइन शाखाबाट डग स्निफिङसहित खटिएको टोलीले इटहरीबाट धरानतर्फ जाँदै गरेको यात्रुवाहक बसमा सवार हरिनगरा गाउँपालिका–२ का १८ वर्षीय एइसन मन्सुरी र दुहबी नगरपालिका–२ का २० वर्षीय मोहमद दिलकशलाई चेकजाँच गरेको थियो ।
चेकजाँचका क्रममा उनीहरूको साथबाट नाइट्राजेपाम १९० थान ट्याब्लेट बरामद भएको प्रहरीले जनाएको छ ।
लागूऔषधसहित पक्राउ परेका दुवै जनालाई इलाका प्रहरी कार्यालय इटहरीमा ल्याई थप अनुसन्धान भइरहेको प्रहरीले जनाएको छ ।
Discussion about this post