इटहरी : शतिसाले फुटबल क्लबले उदयपुरको फ्युजन फुटबल क्लबलाई पराजित गर्दै तालतलैया गोल्डकप फुटबल प्रतियोगिताको उपाधि जितेको छ ।
इटहरी–२ स्थित बुढासुब्बा खेलमैदानमा शनिबार सम्पन्न फाइनल खेलमा शतिसालेले फ्युजनलाई ३–० गोल अन्तरले पराजित गर्दै उपाधि हात पारेको हो ।
शतिसालेको जितमा विनोद राई, विकास परियार र साजन बर्देवाले गोल गरे । पहिलो हाफको ३४औँ मिनेटमा विनोदले गोल गर्दै टोलीलाई अग्रता दिलाएका थिए । दोस्रो हाफमा विकासले ३१औँ र साजनले ३७औँ मिनेटमा गोल थपेपछि शतिसालेले सहज जित निकालेको हो ।
उपाधिसँगै शतिसालेले ट्रफीसहित नगद एक लाख ११ हजार एक सय ११ रुपैयाँ प्राप्त गरेको छ । उपविजेता फ्युजन फुटबल क्लबले ट्रफीसहित ५५ हजार पाँच सय ५५ रुपैयाँ प्राप्त गरेको आयोजक तालतलैया फुटबल क्लबका सचिव रोशन भुजेलले जानकारी दिए ।
प्रतियोगितामा शतिसालेका विपुल मगर उत्कृष्ट गोलकिपर, सञ्जय श्रेष्ठ उत्कृष्ट डिफेन्डर, विकास परियार उत्कृष्ट मिडफिल्डर र विनोद राई उत्कृष्ट फरवार्ड घोषित भए । शतिसालेकै शुरेन मगर उत्कृष्ट प्रशिक्षक घोषित भए ।
विजेता टिमलाई कोशी प्रदेशका सामाजिक विकासमन्त्री गीता तिम्सिनाले पुरस्कार वितरण गरिन् ।
असोज १ गतेदेखि सुरु भएको प्रतियोगितामा आठ टोलीको सहभागिता रहेको आयोजक समितिका अध्यक्ष शंकर राईले जानकारी दिए ।
Discussion about this post