इटहरी : उद्योग वाणिज्य संघ (उवासंघ) इटहरीको निर्वाचन शनिबार हुँदैछ ।
अध्यक्ष पदका लागि चारजना प्रतिष्पर्धामा छन् । जसमध्ये पनि तीनजनाबीच मुख्य प्रतिष्पर्धा हुने देखिएको छ ।
अध्यक्षका लागि जीवन पराजुली, रञ्जु सिग्देल र गायत्री कटवाल (भण्डारी) बीच मुख्य प्रतिष्पर्धा हुने भएको हो । अध्यक्षका उम्मेदवार पीताम्बर पोखरेलले आफ्नो उम्मेदवारी निष्क्रिय पार्दै पराजुलीको समूहलाई समर्थन गरेका छन् । अध्यक्षकै उम्मेदवार मणिन्द्रकुमार कटवाल भने चुनावी प्रचारमा त्यति सक्रिय छैनन् ।
यसैबीच अध्यक्षका उम्मेदवार पराजुलीले आँफू २२ वर्षकै उमेरदेखि व्यवसायमा लागेका कारण र व्यवसायीको हितमा काम गर्ने भएकाले चुनाव जित्ने दाबी गर्दै आएका छन् ।
इटहरीदेखि दार्जीलिङ हुँदै काठमाडौँसम्म पुगेर शैक्षिक अध्ययन गरेका उनले यसअघि जेसीज, लायन्स जस्ता संस्थामा नेतृत्व गरिसकेका छन् ।
तरहरा जेसीज वर्ष २०१३ का अध्यक्ष तथा नेपाल जेसीजका पूर्व राष्ट्रिय उपाध्यक्ष समेत भइसकेका उनी लायन्स क्लब अफ इटहरी सिटी र लायन्स क्लब अफ ३२५ को जोन चियरपर्सन भइसकेका छन् ।
होटल व्यवसायी संघ इटहरीको वर्तमान अध्यक्ष तथा उद्योग वाणिज्य संघ इटहरीका वर्तमान सदस्य समेत रहेका उनी पर्यटनको क्षेत्रमा समेत काम गर्दै आएका छन् ।
‘व्यवसायीको मुख्य समस्या भनेकै कर हो, पार्किङका कुरा आइरहेका छन्,’ पराजुली भन्छन्, ‘ब्याजदरले व्यवसायीलाई पिरोलिरहेको छ, घरभाडा बहाल कर सम्बन्धि मुद्दा उठिरहेका छन्, यी सबै समस्या न्यूनीकरणका लागि मेरो नेतृत्व सार्थक हुन्छ ।’
उनले अहिले इटहरीको मुख्य चौकमा पार्किङ व्यवस्थापन समस्या भइरहेकाले त्यसको दीर्घकालीन व्यवस्थापनका लागि आँफूले काम गर्ने बताए ।
‘होलसेल र रिटेलको समस्या समाधानका कुरादेखि बिहीबार र शनिबारको बन्दबारे पनि छलफल गर्न मेरो भूमिका महत्वपूर्ण हुन्छ,’ पराजुली भन्छन्, ‘उद्यमशील विकासका तालिमार्फत व्यवसायीहरूलाई प्रोत्साहित गर्ने कार्ययोजना म सँग छ ।’
आँफू यसअघि पनि सबै व्यवसायीका शान्ति सुरक्षाका कुरामा काम गर्दै आएकाले सबै समस्याबारे छलफल गरी समाधानतर्फ उन्मुख हुने उनले बताए ।
उनले भने, ‘म सरल र सजिलो मान्छे हुँ भनेर व्यवसायी साथीहरूले नै भन्नुहुन्छ, त्यसैले व्यवसायीले जतिबेला जहाँ बोलाउँदा पनि मेरो उपस्थिति हुनेछ ।’
उनले स–साना व्यवसायदेखि ठूला व्यवसायीलाई समेत समेट्दै एकसुत्रमा उनेर काम गर्ने प्रतिबद्वता व्यक्त गरे ।
‘विगतमा व्यवसायिक हितको निम्ति काम गरेकै कारण मलाई रोज्नैपर्छ भन्ने लाग्छ,’ उनले भने, ‘इटहरी व्यवसायिक हब बन्दै गर्दा यहाँ आएका समस्या समाधानमा हातेमालो गर्न मेरो उम्मेदवारी हो ।’
उनले आँफू निर्वाचित भएर आइसकेपछि पदाधिकारीमध्ये एकजना दैनिक ४ घण्टा कार्यालयमा रही व्यवसायीको समस्या बुझ्ने बताए । आँफूले २३ बुँदे प्रतिबद्वता सार्वजनिक गरेकाले सो पूरा गर्न कुनै कसर बाँकी नराख्ने पराजुलीको भनाइ छ ।
यो पनि – उवासंघ इटहरी निर्वाचन : यस्ता छन् अध्यक्षका उम्मेदवार जीवन पराजुली समूहका २३ संकल्प
यो पनि – उवासंघ इटहरी निर्वाचन : अध्यक्षका उम्मेदवार जीवन पराजुलीलाई ६ दलको साथ (कसले के भने ?)
Discussion about this post