इटहरी : आइतवार (आज)देखि कोशी प्रदेशसभाको बर्खे एवं सातौं अधिवेशन सुरु हुँदैछ ।
प्रदेशसभाको बजेट अधिवेशनसमेत भएकाले प्रदेशसभमा प्रतिनिधित्व गर्ने राजनीतिक दलले बैठकमा आ–आफ्नो धारणा राख्नेछन् ।
प्रदेशसभाका कार्यवाहक सचिव गौतमराज अमात्यका अनुसार सातौं अधिवेशनको पहिलो बैठक प्रदेशसभा भवनमा दिउँसो २ बजेका लागि बोलाइएको छ ।
बैठकमा कोशी प्रदेश प्रमुख परशुराम खापुङको कार्यालयबाट प्राप्त पत्रबारे सदनमा जानकारी गराइने उनले जनाए । सरकारले ल्याएको प्रदेश ऐनलाई संशोधन गर्न बनेको अध्यादेश, २०८२ प्रदेशसभा बैठकमा टेबुल हुनेछ ।
हालसम्म प्रदेशसभाले ल्याइएको ८३ मध्ये ६० वटा विधेयक प्रमाणित भइसकेका छन् ।
पछिल्लोपटक गत वर्ष फागुन २८ मा पर्यटन वन तथा वातावरण मन्त्रालयको कोशी प्रदेश प्रदेश वातावरण संरक्षण ऐन, २०७६ लाई संशोधन गर्न बनेको विधेयक, २०८१ र भौतिक पूर्वाधार विकास मन्त्रालयको प्रदेश भवन ऐन, २०७६ लाई संशोधन गर्न बनेको विधेयक प्रमाणित भएको थियो ।
प्रदेश सरकारको वैशाख २४ गते बसेको मन्त्रिपरिषद् बैठकले प्रदेशसभाको बर्खे अधिवेशनका लागि प्रदेश प्रमुख खापुङसमक्ष सिफारिस गरेको थियो ।
सरकारको सिफारिसका आधारमा प्रदेश प्रमुखले जेठ ४ गतेका लागि बैठक आह्वान गरेका हुन् ।
Discussion about this post