उदयपुृर । भोटेकोशी बाढीमा नुवाकोटको त्रिशूलीबाट बेपत्ता भएका उदयपुरका ४२ वर्षीय देवेन्द्र घिमिरेको प्रतीकात्मक कुशको शव बनाएर शनिबार अन्त्येष्टी गरिएको छ ।
भोटेकोशीमा भदौ १० गते आएको बाढीपछि बेपत्ता भएका उदयपुरको त्रियुगा नगरपालिका–४ बगाहा लाइनटोलका ४२ वर्षीय देवेन्द्र घिमिरेको कुशको शव बनाएर वैदिक परम्पराअनुसार स्थानीय त्रियुगा नदी किनारको घाटमा दाहसंस्कार गरिएको हो ।
घट्नाको १८ दिनसम्म पनि मृत या जीवित फेला नपरेपछि मृत्यु भइसकेको भन्ने ठहर गर्दै आफन्तजनले समाज बोलाएर छोराको अन्त्यष्टि गरेको बाबु उद्धब घिमिरेले बताए । वैदिक परम्परामा क्रिया गर्नका लागि शव अनिवार्य भएकाले कुशको प्रतीक बनाएर अन्त्यष्टी गरेको उनले बताए ।
पेशाले इलेक्ट्रिकल इन्जिनियर रहेका देवेन्द्र रसुवास्थित त्रिशुली सेक्टर ३ को बि जलविद्युत परियोजनामा कार्यरत थिए । बाढीमा परेर बेपत्ता भएका उनीसहित उदयपुरका १५ जना अझै सम्पर्कविहीन छन् । जलविद्युतमै कार्यरत अन्य ४ जना, नेपाली सेनामा कार्यरत ३ जना र चालक तथा ज्यालामजदुरी गर्न गएकाहरु बाढीमा परि बेपत्ता भएकोमा अहिलेसम्म सम्पर्कमा आएका छैनन् ।
बाढीमा परेर उदयपुरका २१ जना बेपत्ता भएकामध्ये ६ जना भने सम्पर्कमा आएका छन् । अहिलेसम्म सम्पर्कमा नआएकाहरुको पहिचान गर्न सहज होस् भनेर परिवारजनको डिएनए नमूना सङ्कलन गरेर पठाइएको छ ।
Discussion about this post