इटहरी : जेनजी आन्दोलनपश्चात् आगजनी र तोडफोडका कारण क्षतिग्रस्त भएको इटहरी उपमहानगरपालिकाको कार्यपालिकाको भवनमै सोमबार १५० औं कार्यपालिका बैठक सम्पन्न भएको छ।
बैठकले नगरवासीको सुरक्षालाई प्राथमिकता दिंदै शान्ति, जनसुरक्षा र सेवा प्रवाहलाई प्रभावकारी बनाउने उद्देश्यका साथ चारवटा महत्वपूर्ण निर्णय गरेको छ।
निर्णयअनुसार शान्ति, सुरक्षा सुदृढ गर्न इलाका प्रहरीलाई उपयुक्त स्थान खोजी व्यवस्थापन गरिनेछ।
मेयर हेमकर्ण पौडेलका अनुसार नगर ट्राफिक व्यवस्थापनलाई सहज बनाउन ट्राफिक प्रहरीलाईसमेत सोही स्थानबाट सेवा प्रवाह गर्ने व्यवस्था गरिने निर्णय भएको छ ।
जसले इटहरीभित्रको भीडभाड, दुर्घटना नियन्त्रण र सुगम यातायातमा सहयोग पुग्ने अपेक्षा गरिएको छ।
त्यसैगरी, जेनजी आन्दोलनका क्रममा इटहरीमा शहादत प्राप्त गरेका व्यक्तिहरूका परिवारलाई प्रति परिवार एक लाख रुपैयाँका दरले आर्थिक सहयोग प्रदान गर्ने निर्णय भएको छ।
नगरको सुरक्षालाई प्राथमिकता दिँदै बैठकले अत्यावश्यक दमकल खरिद गरी तत्काल सञ्चालनमा ल्याउने निर्णय गरेको मेयर पौडेलले जानकारी दिए।
जेनजी आन्दोलनका क्रममा इटहरी उपमहानगरको दमकलसहित सवारीसाधन, मेयर बस्ने भवनसहत अन्य भौतिक संरचनामा आगजनीले पूर्ण क्षति भएको छ।
दमकल अभावले आगलागी नियन्त्रणमा चुनौतीपूर्ण अवस्था रहेको उल्लेख गर्दै यसलाई तत्काल समाधान गर्ने निर्णय गरिएको हो।
साथै, नगरवासीलाई शान्ति र सुरक्षा कायम राख्न सहकार्य गर्न आह्वान गरिएको छ।
Discussion about this post