इटहरी : नेपाली कांग्रेसको १४ औँ महाधिवेशनमा अहिले नेताहरु दौडधुपमा व्यस्त छन् ।
कोही कार्यकर्ता फकाउँन व्यस्त छन् भने कोही कार्यकर्ताको मन जितेर आँफू चुनावी प्रतिष्पर्धामा विजयी हुने निश्चित भएर बसेका छन् ।
सुनसरीको इटहरीमा यही भदौ २७ गते निर्वाचन हुने निश्चित भएसँगै नगरसभापतिका लागि तीनजना प्रत्याशी छन् । नगरसभापतिका लागि विकास केसी, हेमकर्ण पौडेल र प्रकाश बस्नेतले उमेद्दारी दिएका छन् । केसी नेपाल विद्यार्थी संघका निवर्तमान केन्द्रीय उपसभापति हुन् । पौडेल वर्तमान नगरसभापति हुन् भने बस्नेत वर्तमान नगर सचिव हुन् ।
यसैबीच नेपाली कांग्रेस इटहरीका प्रभावशाली नेता समेत रहेका विकास केसीले आफू नगरसभापति हुने दाबी गर्छन् ।
२०३६ चैत्र ३० गते तेह्रथुमको पिप्लेमा जन्मिएका केसीले २०५२ सालदेखि इटहरीबाट राजनीतिक यात्रा सुरु गरे ।
‘२०४७ सालमा इटहरी बसाईँसराईँको क्रममा आएपछि र समयक्रम बुझ्दै गएपछि नै मलाई राजनीति गर्ने इच्छा जागेको हो,’ उनले भने, ‘अहिलेसम्मको राजनीति यात्रामा विद्यार्थीको मात्रै नभई आम सर्वसाधारणको मन जितेको छु भन्ने लाग्छ ।’
२०५२ सालमा नेविसंघको सदस्यता लिएपछि उनी २०५७ सालमा जनता बहुमुखी क्याम्पसमा स्ववियू सदस्य भए । ०५९ मा स्ववियू सह–सचिव, ०६१ मा स्ववियू उप–सभापति, ०६२ मा नेविसंघ जिल्ला सभापति हुँदै २०७३ सालमा नेविसंघको केन्द्रीय उप–सभापति बनेका उनको विद्यार्थी राजनीतिक पृष्ठभूमी हो । केसीले विद्यार्थी राजनीति सँगै आफ्नो पार्टीको राजनीतिलाई पनि अगाडि बढाए ।
इटहरीका थुप्रै सामाजिक संघ संस्थामा पनि अब्बल रुपमा नेतृत्वको भूमिका सम्हालिसकेका केसी आगामी नगर अधिवेशनबाट इटहरी कांग्रेसको नेतृत्व लिने दौडमा छन् ।
केसी भन्छन्, ‘राजनीतिक हिसाबमा विभिन्न ठाउँमा कांग्रेस कार्यकर्ता र आम मानिसको मन जित्दै आएको छु, मत भन्दा पनि ठूलो कुरा त मन जित्नु नै हो रहेछ ।’ उनले यसअघि पनि नगरमा युवाले नेतृत्व गरेका कारण आगामी निर्वाचनबाट पनि युवाहरुले नै नेतृत्व लिनुपर्ने तर्क गरे ।
‘नगर समितिमा युवाहरुको खाँचो छ, मैले पनि अनुभव बटुलेकाले पनि चुनावी मैदानमा होमिएको छु,’ उनले टाकुरान्यूजसँग भने, ‘नेतृत्व परिवर्तन सँगै समाज रुपान्तरणका लागि पनि मेरो उमेद्दारी हो, मेरो नेतृत्वले पार्टीलाई गुट भन्दा माथि गएर सबैलाई समेट्ने अभ्यास गर्नेछु ।’
पार्टीका लागि हरेक समयमा आफूले साथ दिएको र सेवाको भावले राजनीति गरेको केसीले सुनाए ।
‘मैले नेतृत्व गरेँ भने इटहरीमा हाम्रो संगठन एकढिक्का हुने काम गर्छु,’ उनले भने, ‘हामीजस्ता जुझारु युवाहरु मिल्यौँ भनेमात्र देश समृद्धिको बाटोमा अगाडि बढ्छ ।’ उनले आफ्नो नेतृत्वमा आगामी स्थानीय, प्रदेश र प्रतिनिधिसभाको चुनावमा विजयी गराउने मात्र नभई युवाहरुलाई संगठित गर्दै लैजाने बताए ।
पार्टीमा आफूले बीस वर्षभन्दा लामो राजनीति गरेर अग्रणी भूमिका निर्वाह गर्दै आएकाले पनि आगामी समयबाट नेतृत्व लिने पक्का रहेको दाबी गरे । ‘आदीबासी, गरिब र युवा विद्यार्थीसँग हातेमालो गर्दै आजको राजनीति तय गरेको हुँ,’ केसी सुनाउँछन्, ‘इटहरीबासीलाई सहि, असल नेतृत्व हुने आवास दिलाउँनेछु ।’
पार्टीको केन्द्रबिन्दुमा मात्रै नभई सबैका लागि आँफू आशाको केन्द्रबिन्दु बन्नका लागि पनि नेतृत्वको आकांक्षी रहेको सुनाए । ‘अहिलेसम्म मेरो राजनीति यात्रा समग्र इटहरीको विकासका लागि नै थियो,’ उनले भने, ‘आगामी दिनमा पनि म यहाँको विकासका लागि अग्रणी रुपमा भूमिका निर्वाह गर्नेछु ।’
विद्यार्थी र कार्यकर्तामाझ मात्र नभई सिंगो इटहरीका लागि लोकप्रिय नेताका रुपमा परिचित बन्नका लागि पनि आफ्नो नेतृत्व आवश्यक रहेको उनी बताउँछन् ।
उनले आँफूले अहिलेसम्म राजनीतिलाई व्यवसायको रुपमा भन्दा पनि सेवाको रुपमा लिएको बताए । भने, ‘मैले राजनीतिलाई व्यवसाय भन्दा पनि समाजसेवाको रुपमा हेरेको छु, देश निर्माणका लागि युवाहरुको भूमिका भएकाले हामी सचेत छौँ ।’
नेतृत्व लिन्छु भन्नेले जागीर खाएर नभई समाजसेवाको भावमा नेतृत्व लिनुपर्ने उनको बुझाई छ । उनले आँफूले पार्टीलाई र जनतालाई दिने समय प्रयाप्त रहेकाले पनि आँफू राजनीतिमा सक्रिय रहेको तर्क गरे ।
पछिल्लो केही वर्षयता इटहरी क्षेत्रका युवाहरुले कुनै अफ्ट्यारो, असजिलो र असहज परिस्थिति हुँदा होस् वा अन्य कुनै काम गर्नुपर्दा नै, झट्ट सम्झिने नाम हो – विकास केसी ।
इटहरीमा रहेर राजनीतिसँगै सामाजिक काममा पनि सक्रिय रहेका केसी पछिल्लो समय युवाहरुका मात्र नभई वृद्व–वृद्वा, रोगी तथा अन्य पीडितको सहारा बन्दै आएका छन् । उपचार नपाएर हस्पिटलमा भौतारिरहेका हुन् वा अन्य सामाजिक काम गर्नका लागि नै, उनी पुगेर भाइचारा अभिवृद्वि हुने काम गर्छन् ।
‘युवाहरूलाई सृजनशील बन्न प्रेरित गर्ने उदेश्यले उर्जा प्रदान गरिरहेको छु,’ केसी भन्छन्, ‘समाजको मुहार परिवर्तन गर्नका लागि युवाहरुको महत्वपूर्ण भूमिका हुन्छ, त्यसैले युवाहरुलाई सकारात्मक बाटोमा हिड्नका लागि प्रेरित समेत गर्दै आएको छु ।’
Discussion about this post