इटहरी : यही बैशाख ३० गते हुने स्थानीय तहको निर्वाचनमा इटहरी उपमहानगरपालिका वडा नं. २ मा मतदाता उत्साहित भएका छन् ।
नेपाली कांग्रेसबाट वडाध्यक्षका उम्मेदवार रहेका राजु बस्नेतले आफ्नो घरदैलो अभियानअन्तर्गत आफूलाई जनताले विश्वास दिलाएका कारण चुनाव जित्ने बताउँदै आएका छन् । मतदाता उत्साहित भएका कारण यसपटक गठबन्धनका उम्मेदवारलाई विजयी गराउने उनको विश्वास छ ।
यसअघि नेकपा एमालेले चुनाव जितेको इटहरी २ मा विकास निर्माणका काम सुस्त भएको बस्नेतको आरोप छ । उनले आफूहरुले अहिले शिक्षा, स्वास्थ्य जस्ता कुरालाई मुख्य प्राथमिकतामा राखेको बताए ।
उनले इटहरी २ मा नेकपा एमालेले यस क्षेत्रलाई आफ्नो कब्जामा राख्दै, हैकमवादी सोच राखेर शासन सञ्चालन गरेको आरोप लगाए ।
‘स्थानीय सरकारले हालसम्म प्रदान गर्न नसकेको प्रभावकारी सेवा र विकास निर्माणलाई उच्च प्राथमिकताका साथ दलीय स्वार्थ भन्दा माथि उठेर वडाबासीको सेवा गर्ने हाम्रो प्रतिवद्धता छ ।’ उनले भने ।
आफूले घोषणापत्रमा प्राकृतिक विपद, महामारी तथा संक्रमणहरुमा तत्काल बिशेषज्ञ, डाक्टरसहित घर घरमा निःशुल्क उपचार वा साहयताको व्यवस्था गर्ने जस्ता कुरालाई प्राथमिकतामा राखेको बस्नेतले बताए ।
यता, नेपाली कांग्रेस सुनसरी क्षेत्र नं. २ (क) का सचिव समेत रहेका चिन्तामणि सापकोटाले यसपटक इटहरी २ मा एमालेको विरासत गुम्ने दाबी गरे । उनले भने, ‘सधैँ यहाँ एमालेले दाबी गर्दै आएको छ, यहाँ यसपटक एमालेको विरासत गुम्दैछ, हामी चुनाव जित्ने अन्तिम तयारीमा छौँ ।’
उनले यसपटक कांग्रेसले अशक्त, जेष्ठ नागरिक, एकल महिला, अपाङ्ग र शारीरिक दुर्वलता भएका वडाबासीहरुको सामाजिक सुरक्षा भत्ता घर दैलोसम्म पु¥याउन बैंकसँग समन्वय गर्नेजस्ता प्रतिबद्धताले पनि आफूहरु चुनाव जित्ने दाबी गरे ।
कांग्रेसका क्षेत्रीय प्रतिनिधि समेत रहेका रोशन अधिकारीले कांग्रेसमा यसपटक एकताबद्ध भएका कारण पनि उत्साह बढेको बताए ।
उनले वडामा प्राथमिक स्वास्थ्य केन्द्रको निर्माण, स्तरोन्नती गरी त्यसैको परिसरमा रेडक्रस शाखा र एम्बुलेन्स सेवाको व्यवस्थापन गरी स्वास्थ्य सेवालाई सर्वसुलभ बनाउने र माथिल्लो निकायसँग समन्वय गरी समय समयमा स्वास्थ्य शिविर संचालन गर्ने कुरालाई घोषणापत्रमा उल्लेख गरिएको छ ।
यस्तै, वडाभित्रका सामुदायिक विद्यालय (महेन्द्र मा.वि, शान्ति प्रा.वि) मा नर्सरी कक्षादेखि क्रमशः अंग्रेजी माध्ययममा अध्ययन, अध्यापनको प्रबन्ध मिलाउने जस्ता कुरालाई घोषणापत्रमा उल्लेख गरिएको छ ।
नेपाली कांग्रेसकी प्रदेश प्रतिनिधि शुभद्रा राईले कांग्रेस एक भएका कारण तथा गठबन्धनका कारण पनि आफूहरुले यसपकट चुनाव जित्ने बताइन् । उनले कांग्रेसमा एकता, र दृढ संकल्प भएका कारण आफूहरुमा उत्साह भएको बताइन् ।
यता, नेपाली कांग्रेस इटहरी २ का सभापति दीपेन्द्र घिमिरेले जसले टिकट पाएपनि गठबन्धनलाई जिताउन आफूहरु लागि परेको बताए ।
उनले भने, ‘यसपटक इटहरी २ मा मात्रै होइन, इटहरीले नै जित्नेछ, हामी एक छौँ ।’ उनले अहिले घरदैलो अभियानमा आफूहरुले जनताको साथ पाएकाले चुनाव जित्ने बताए ।
उनले भने, ‘हामीले अहिले घरदैलो अभियानमा जुन साथ पाएका छौँ, त्यसैकारण पनि चुनाव जितेको अनुभूत गरेका छौँ, यसपटक इटहरी २ मा एमालेको विरासत गुम्दैछ ।’
Discussion about this post