इटहरी : बैशाख ३० गते हुने स्थानीय तहको निर्वाचनमा इटहरी उपमहानगरपालिकामा अहिलेसम्म जित्दै आएको एमालेलाई हराउने रणनीतिमा गठबन्धन बलियो रूपमा हाबी भएको छ ।
नेपाली कांग्रेसले नेतृत्व गरेको गठबन्धनमा इटहरी उपमहानगरपालिकाको मेयरमा हेमकर्ण पौडेल चुनावी मैदानमा छन् ।
पौडेलको राजनीतिक पृष्ठभूमि
२०३५ चैत २१ गते झापाको केरोबारीमा जन्मिएका पौडेल २०४६ सालदेखि इटहरी बसेका हुन् । सानै उमेरदेखि राजनीतिमा चासो राख्ने उनी तरुण दल सुनसरीको सचिव, नेपाल विद्यार्थी संघ सुनसरीको सचिव, पार्टीको क्षेत्रीय सदस्य हुँदै हाल इटहरी नगर सभापति छन् ।
पौडेल पूर्वका चर्चित नेता हुन् । गठबन्धनको तर्फबाट नेपाली कांग्रेसका मेयरमा उम्मेदवार उनले नेविसंघबाट आफ्नो राजनीतिक यात्रा अगाडि बढाए । युवा, विद्यार्थी र उद्यमीको पक्षमा अनवरत लागिपरेका पौडेल इटहरीका जनताले आशाका केन्द्रका रूपमा लिन्छन् ।
२०५७ सालमा जनता बहुमुखी क्याम्पसको स्वतन्त्र विद्यार्थी यूनीयन (स्ववियू) को निर्वाचनमा नेपाल विद्यार्थी संघबाट सभापतिमा विजयी भए । त्यससँगै निरन्तर राजनीति यात्रालाई अगाडि बढाएका पौडेल हाल नेपाली कांग्रेस इटहरीको नगरसभापति समेत छन् ।
उनको यो तेस्रो कार्यकाल हो । उनी लगातार १२, १३ र १४ औँ महाधिवेशनमा कांग्रेस इटहरीको सभापतिमा निर्वाचित भएका हुन् ।
यसो भन्छन्
उनले अहिलेसम्म इटहरीमा नेकपा एमालेले सत्ता कब्जा गरेर जनतालाई दुःख दिएको बताउँदै भने, ‘हामीले विकासका कुरा उठाउँदै आएका छौँ, विकास भनेको भौतिक विकास मात्रै होइन, हामीले शैक्षिक उन्नयनका कुरा गरिरहेका छौँ, स्वास्थ्यका कुरा गरिरहेका छौँ, मानवीय विकासका कुरा गरिरहेका छौँ ।’
गठबन्धनले इटहरीबासीको आर्थिक, सामाजिक विकासका मुद्वाका कुरा उठाएकाले एकपटक अवसर दिएर हेर्नुपर्ने पौडेलको तर्क छ ।
इटहरीमा एमालेको सरकार रहँदा सर्वहारा नागरिकले आधारभूत आवश्यकता पनि पूरा नगरेको आरोप लगाउँदै पौडेलले भने, ‘एमालेका साथीहरुलाई अहंकार र दम्भ पलायो, जनतामाथि जे गर्दा पनि हुन्छ भन्ने भान भयो, यो कुरा जनतालाई कदापी स्वीकार्य हुनेछैन ।’
उनले बैशाख ३० गते हुने स्थानीय तहको निर्वाचनमा आफूहरू सबैठाउँ पुुग्न नसकिने बताउँदै गठबन्धनको विचार इटहरीबासीकहाँ पुुग्नुपर्ने तर्क राखे ।
इटहरीमा बर्षेनी बाढीले दुःख दिएकाले यसपटक भने गठबन्धनले इटहरीमा नेतृत्व गर्ने भएकाले त्यसको समाधान हुने पौडेल बताउँछन् । ‘इटहरीमा सधैँ एमालेले जितिरह्यो, इटहरीले हारिरह्यो,’ पौडेलले भने, ‘एमाले नेतृत्वको सरकारले धेरै मुद्वा अलपत्र पारेको छ ।’ उनले नेतृत्वमा दूरदर्शिता, क्षमता नभएको आरोप लगाउँदै इटहरीमा विकासले गति नलिएको बताए ।
उनले शेरा खोलाका कारण बर्सेनी बस्तीमा बाढी पस्ने भएकाले त्यसको ठोस कदम नभएकाले अब कांग्रेसको नेतृत्वले त्यसको समाधान गर्ने तर्क राखे । उनले भने, ‘यसपटक कांग्रेसले नेतृत्व गर्ने अवसर पायो भने निर्वाचित भएकै वर्षदेखि काम अगाडि बढ्नेछ ।’
पाँच दलीय गठबन्धनको सहयोगमा उम्मेदवारी दिएका उनी यसपटक एमालेको लालकिल्ला तोड्ने दाउमा छन् । उनले आफूहरू इटहरीलाई साँच्चिकै बदल्ने सोचमा चुनावी मैदानमा आएको बताए ।
उनले भने, ‘हामी इटहरीलाई साँच्चै बदल्ने सोचमा छौँ, तपाईँहरू पनि परिवर्तन चाहनुहुन्छ भने मत हाल्नेबेला मात्रै ३० सेकेन्ड दल परिवर्तन गर्नुहोस् र गठबन्धनलाई मत दिनुहोस्, हामी इटहरी बदल्छौँ ।’
उनले इटहरीमा यसअघि नेकपा एमाले निर्वाचित भएपनि दूरदर्शी नेतृत्व नभएको आरोप लगाए ।
उनले भने, ‘एमालेको नेतृत्व दूरदर्शी थिएन, यो जनताको दोष होइन । हिजोको दिनका सरकारदेखि जनता डराएर हिड्नुप¥या, अब सबै जाति, भाषाभाषीहरूले सरकार भएको महसुस गर्नेछन् ।’
उनले कांग्रेसले नेतृत्व गरेको गठबन्धन विजयी भएको अवस्थामा यहाँका आम सर्वहारा जनताले सरकार खोज्दै उपमहानगर आउन नपर्ने बताए ।
‘अब सरकार खोज्दै तपाईहरू उपमहानगरको गेटसम्म आउनुपर्दैन, यो सरकार जनमुखी हुन्छ, सरकार गाउँ–गाउँमा जनताका समस्या नियाल्न पुग्छ ।’ पौडेलले भने ।
उपमहानगरका २० वटा वडामध्ये सात वटा वडामा एमाले, १२ वटामा कांग्रेस र एउटा वडामा तत्कालीन मधेसी जनअधिकारका उम्मेदवार विजयी भएका थिए ।
इटहरीमा २०४८ सालपछि भएको स्थानीय तह निर्वाचनमा एमालेले मेयर जित्दै आएको छ । अबको चुनावमा भने जसरी पनि जित्ने दाबी गर्छन् कांग्रेसबाट मेयर उम्मेदवार पौडेल ।
यसपटक गठबन्धनका कारण पनि आफ्नो चुनाव जित्ने आधार रहेको उनको अंकगणित छ । एमाले फुटेर बनेको नेकपा एकीकृत समाजवादी, माओबादी कन्द्र र जनता समाजवादी पार्टी (जसपा) को मतका कारण पनि आफू र गठबन्धनले चुनाव जित्ने उनको विश्वास छ ।
०७४ को चुनावमा एमालेका द्वारिकलाल चौधरीले कांग्रेसका रोहित प्रसाईलाई पराजित गरेका थिए । चौधरीले २२ हजार ६८९ मत ल्याउँदा प्रसाईले १९ हजार ९८५ मत ल्याएका थिए ।
यस्तै, माओवादी केन्द्रकी हरिमाया जिमीको मत तीन हजार ३६४ थियो । राप्रपाका रमेश कार्कीले तीन हजार ७१५ पाएका थिए ।
Discussion about this post