विराटनगर : कोसी प्रदेशका मुख्यमन्त्री हिक्मतकुमार कार्कीले सरकारले सञ्चालन गर्ने आयोजनाहरूले उत्पादकत्व वृद्वि गरी गरिबी निवारण र आयात प्रतिस्थापन गर्न जोड दिनुपर्ने बताएका छन् ।
पहाडी क्षेत्र काष्ठफल तथा फलफूल विकास आयोजनाले मंगलबार विराटनगरमा आयोजना गरेको छलफल कार्यक्रममा बोल्दै उनले उक्त कुरा बताएका हुन् ।
मुख्यमन्त्री कार्कीले पहाडी क्षेत्रको बढ्दो बसाइँ सराईलाई रोक्न पनि आयोजना सफल हुने विश्वास व्यक्त गरे ।
उनले विगतमा धेरै आयोजनाहरू सञ्चालन भएपनि तिनले प्रभावकारी काम गर्न नसकेको चर्चा गर्दै ‘पहाडी क्षेत्र काष्ठफल तथा फलफूल विकास आयोजना’ले आयोजना क्षेत्रका किसानको जीवनमा परिवर्तन ल्याउनेगरी काम गर्नुपर्ने बताए ।
उनले आयोजना सफल पार्न निजी क्षेत्रलाई पनि सँगसँगै लैजानुपर्ने सुझाव दिदैँ सरकारी क्षेत्रको मात्र सहयोगमा आयोजना सफल हुन नसक्ने बताए ।
आयोजनाले काम गर्दै जाँदा बजारीकरण लगायतका अनेक समस्या आउने भएकाले ती समस्याको समाधान गर्न निजी क्षेत्र अपरिहार्य भएको मुख्यमन्त्री कार्कीको भनाई छ ।
पहाडी क्षेत्रका विभिन्न ३४ जिल्लालाई कार्यक्षेत्र बनाएर सञ्चालनमा आएको उक्त आयोजनाले स्याउ, एभोकार्ड लगायतका फलफूल उत्पादनमा लगानी गर्दै आएको छ ।
Discussion about this post