इटहरी : इटहरीमा नगरसभा बैठक स्थगित भएपछि नेकपा एमालेले आपत्ति जनाएको छ ।
बुधबार साँझ पत्रकार सम्मेलन गरी एमाले इटहरी नगर कमिटिले आपत्ति जनाएको हो । नगरसभाको बैठक एकतर्फी र हठात ढंगबाट स्थगित भएकोमा गम्भीर ध्यानाकर्षण भएको एमाले इटहरीका कार्यबाहक अध्यक्ष रुपेश बस्नेतले बताए ।
मेयर हेमकर्ण पौडेलले हठात ढंगबाट नगरसभा एकतर्फी किसिमले स्थगित गरेको भन्दै नगर सरकार ‘असक्षम’ रहेको उनको आरोप छ ।
आर्थिक वर्ष २०८०/०८१ को नगर सभाबाट पारित आर्थिक ऐन २०८० ले व्यवस्था गरेको कर तथा राजस्वका दरमा विवाद आएपछि इटहरी ३ का वडाध्यक्ष उमेश सुवेदीको संयोजकत्वमा कार्यदल गठन भएको थियो ।
गत साउन २६ गतेको १३३ औँ कार्यपालिका बैठकको निर्णयले सुवेदीलाई कर समायोजन समितिको संयोजक बनाउने निर्णय गरेको थियो ।
यही विषयमा गत पुस ४ गते सम्पन्न १३६ औँ कार्यपालिका बैठकले सुवेदीले बुझाएको प्रतिवेदन हुबहु पारित गर्ने सहमति भएको थियो ।
अस्वभाविक र अवैज्ञानिक ढंगले बढाएको कर समायोजन गर्ने भनिएपनि नगरसभा बैठक नै नगरसभा सदस्यलाई थाहै नदिई स्थगित गरेपछि एमाले शंसकित बनेको छ ।
कर समायोजन तथा पुनरावलोकन गर्नका लागि विगत ६ महिनादेखि गरिएको सबैको सामूहिक प्रयासलाई सफल बनाउने नगरसभा बैठक अन्तिम क्षणमा स्थगित हुनु नियोजित र दुभाग्यपूर्ण भएको विज्ञप्तिमा उल्लेख छ ।
‘इटहरीको समृद्वि, विकास तथा सरकार सञ्चालनका क्रममा उत्पन्न समस्याहरू समाधानका निमित्त संवाद, सहमति र सहकार्य गर्ने नेकपा एमालेको प्रतिबद्धतालाई कमजोरीको रूपमा नलिन इटहरी नगर सरकारका प्रमुखलाई सचेत गराउन चाहान्छौं,’ विज्ञप्तिमा भनिएको छ, ‘अस्वभाविक र अवैज्ञानिक ढंगबाट वृद्वि गरिएको कर÷राजस्वको दर समायोजन गर्नको लागि स्थगित गरिएको १४ औँ नगरसभाको बैठक तुरुन्त बोलाइ आम नगरबासीको चाहनालाई सम्बोधन गरिदिन हार्दिक अपिल गर्दछौँ ।’
यता, नगर प्रमुख पौडेलले भने सबैसँग सहमति र सहकार्य गरेर सरकार चलाउने बताएका छन् । ‘सस्तो लोकप्रियताका लागि हुने धेरै राजनीतिक नाटक हेरेर, सुनेर बसेँ । नगर प्रमुख भएर धेरै कति बोलौँ ? सहमति र सहकार्य गरेर सरकार चलाउँछु ।’
उनले सामाजिक सञ्जालमा लेखेका छन् । एमालेले प्रेस विज्ञप्ति जारी गरेपछि नगर प्रमुख पौडेलले जनतामा भ्रमको पर्दा राखेर बस्ने दल र त्यसपछाडिका पात्रको भूमिकबारे पर्दा च्यात्ने बेला भएको उनले उल्लेख गरेका छन् ।
इटहरी उपमहानगरपालिकाले भूमिकरमा अवैज्ञानिक ढंगबाट तीन सय प्रतिशतभन्दा धेरै कर वृद्वि गरेपछि आलोचना हुँदै आएको छ ।
Discussion about this post