इटहरी : उच्च शिक्षालय तथा माध्यमिक विद्यालय संघ हिसान सुनसरीको स्पोर्टस् मिट अन्तर्गत भलिबल प्रतियोगिताको उपाधि छात्रतर्फ इटहरीको विश्व आदर्श र छात्रातर्फ धरान आदर्शले जितेको छ ।
इटहरी २० तरहरास्थित पूर्वाञ्चल कलेजको कोर्टमा सम्पन्न फाइनल खेलमा छात्रतर्फको फाइनलमा विश्व आदर्शले पूर्वाञ्चल कलेजलाई ३–१ को सेटले पराजित गर्दै उपाधि जितेको हो ।
पहिलो सेट ३०–२८ ले जितेको विश्व आदर्शले दोस्रो सेट २२–२५ ले हारेको थियो । तेस्रो सेट २८–२६ ले जितेको विश्व आदर्शले चौथो सेटमा २५–२३ को पुनरागमन जीत हात पार्दै उपाधि जितेको हो ।
गत वर्ष पनि विश्व आदर्शले उपाधि चुमेको थियो ।
छात्रातर्फ धरान आदर्शले पूर्वाञ्चल कलेजलाई ३–१ को सेटलेनै पराजित गरेको छ । पहिलो सेट २५–२० ले हारेको धरान आदर्शले त्यसपछि २८–२६, २९–२७ र ३०–२८ को लगातार जीत हात पार्दै उपाधि चुमेको हो ।
फुटबलमा पूर्वाञ्चल र सुष्मा कलेज फाइनलमा
हिसान स्पोर्टस् मिट अन्तर्गत हिसान एन्फा सुनसरी कप अन्तर विद्यालय फुटबल प्रतियोगिताको बिहीबार भएको सेमिफाइनल खेलमा विजयी हुँदै सुस्ष्मा कलेज र पूर्वाञ्चल कलेज उपाधि नजिक पुगेका छन् ।
बिहीबारको पहिलो सेमिफाइनल खेलमा पूर्वाञ्चलले प्रिमियर कलेजलाई ४–० ले पराजित गर्दै फाइनलमा स्थान सुरक्षित गरेको हो ।
बिहीबार नै सम्पन्न दोस्रो सेमिफाइनलमा सुष्मा कलेजले विश्व आदर्शलाई २–१ गोल अन्तरले पराजित गर्दै फाइनलमा स्थान सुरक्षित गरेको हो । फाइनल खेल शुक्रबार हुने प्रतियोगिता संयोजक एवंम एन्फा सुनसरी महासचिव कोबिदजंग कार्कीले जानकारी दिए ।
क्रिकेटमा विश्व आदर्श फाइनलमा
क्रिकेट प्रतियोगिता अन्तर्गत बिहीबार भएको सेमिफाइनल खेलमा जीत हात पार्दै विश्व आदर्श कलेज उपाधि नजिक पुगेको छ ।
विश्व आदर्शले पूर्वाञ्चल कलेजलाई पराजित गर्दै फाइनलमा स्थान सुरक्षित गरेको हो । बिहीबार हुने भनिएको अर्को सेमिफाइनल खेल स्थगित भएको छ ।
स्मल हेभन कलेज र कस्तुरी कलेजबीच हुने भनिएको सेमिफाइनल खेलमा प्रोटेस्ट परेकाले शुक्रबारसम्मको लागि स्थगित गरिएको छ ।
Discussion about this post