झापा ” कोशी प्रदेशका मुख्यमन्त्री हिक्मतकुमार कार्कीले लागूऔषध दुर्व्यसन र मौसमजन्य विपद् नेपालका गम्भीर चुनौतीका रूपमा देखापरेको भन्दै यसको रोकथाम तथा न्यूनीकरणका लागि राज्य, स्थानीय तह, सुरक्षा निकाय, विद्यालय र अभिभावकसहित सबै पक्षको सामूहिक प्रयास आवश्यक रहेको बताएका छन्।
जिल्ला प्रहरी कार्यालय झापाले बिर्तामोडमा आयोजना गरेको ‘लागूऔषधविरूद्ध झापा अभियान–२०८३’को शुभारम्भ गर्दै मुख्यमन्त्री कार्कीले लागूऔषध दुर्व्यसनको प्रभाव घर–घरमा पुगिसकेको उल्लेख गर्दै प्रत्येक अभिभावकले आफ्ना छोराछोरीको गतिविधिप्रति सजग रहनुपर्ने बताए।
नेपाल–भारत खुला सीमाना लागूऔषध नियन्त्रणमा चुनौतीपूर्ण रहेको उल्लेख गर्दै उनले एक समय सीमावर्ती क्षेत्रमा सीमित रहेको दुर्व्यसन अहिले तराई हुँदै पहाड र हिमाली जिल्लासम्म फैलिएको बताए।
मुख्यमन्त्री कार्कीले प्राकृतिक तथा मानव सिर्जित विपद् दुवैको जोखिम बढ्दै गएको उल्लेख गर्दै विपद् व्यवस्थापन र पूर्वतयारीमा सबै निकायबीच समन्वय आवश्यक रहेको बताए। घटना भएपछि मात्र होइन, घटना हुन नदिनेतर्फ सबैको ध्यान केन्द्रित हुनुपर्ने उनको भनाइ थियो।
उनले झापा, मोरङ र सुनसरीमा लागूऔषध प्रयोगकर्ताको संख्या चिन्ताजनक रहेकाले प्रदेशस्तरीय समन्वित योजना बनाएर अघि बढ्नुपर्ने आवश्यकता औंल्याए।
आगामी आर्थिक वर्षको बजेटमा मेचीनगरको धाइजन र विराटनगरको रानीस्थित कोरोना होल्डिङ सेन्टरलाई लागूऔषध दुर्व्यसनीहरूको पुनःस्थापना केन्द्रका रूपमा सञ्चालन गर्ने प्रस्ताव समावेश गरिएको जानकारी दिँदै उनले यसबारे सुरक्षा निकाय र प्रशासनसँग छलफल भइसकेको बताए।
पुनःस्थापना केन्द्र सञ्चालनमा निजी क्षेत्रबाट सञ्चालित सुधार केन्द्रको सहयोग आवश्यक रहेको उल्लेख गर्दै उनले स्थानीय तहलाई पनि बजेट तथा कार्यक्रममा यस्ता योजना समावेश गर्न आग्रह गरे।
मुख्यमन्त्री कार्कीले अभिभावक, विद्यालय, प्याब्सन, एन–प्याब्सनलगायत शैक्षिक संस्थाहरूले विद्यार्थीको व्यवहार र गतिविधिमाथि निरन्तर निगरानी राख्नुपर्नेमा जोड दिए।
उनले आफ्नो पहिलो कार्यकालमा सुरु गरिएको ‘म अघि बढ्छु’ कार्यक्रम आगामी आर्थिक वर्षदेखि पुनः सञ्चालन गरिने जानकारी दिँदै प्रदेशका करिब दुई हजार विद्यालयमार्फत लाखौँ विद्यार्थीमा लागूऔषध दुर्व्यसनविरुद्ध सचेतना फैलाइने बताए।
कार्यक्रममा मुख्यमन्त्री कार्कीले झापा प्रहरीले थालेको लागूऔषध नियन्त्रण अभियानलाई सफल बनाउन कोशी प्रदेश सरकार बजेट, नीति र कार्यक्रममार्फत आवश्यक सहयोग गर्ने प्रतिबद्धता पनि व्यक्त गरे।
Discussion about this post