धरान : कोशी प्रदेशकै प्रख्यात रुद्राक्षारण्यमा रहेको श्रीपिण्डेश्वर बाबाधाम मन्दिरमा आइतबारदेखि १५ दिने
रथोत्सव कार्यक्रम आयोजना हुने भएको छ ।
परापूर्वकालमा यहाँ रुद्राक्षको जंगल रहेको स्थानमा देवताहरुले अमृतको अंशद्वारा पिण्डको आकारमा निर्माण गरेर शिवजीको स्थापना गरेका थिए ।
देवता र दानवहरुले संयुक्त रुपमा गरेको समुन्द्र मन्थनबाट उत्पन्न अमृतको सारलाई देवताहरुले यहाँ स्थापना गरेको रुद्राक्षारण्य महात्म्यमा उल्लेख छ । भगवान श्रीपिण्डेश्वरलाई रुद्राक्षका देवता पनि भनिन्छ ।
रुद्राक्षारण्य महात्म्यमा रथोत्सवको उल्लेख भएका कारण यो वर्षदेखि रथोत्सव गर्न थालिएको हो । भगवान श्रीपिण्डेश्वरको विविध आराधना र उत्सवहरुका बारे रुद्राक्षारण्यमा वर्णन गरिएको छ ।
यी उत्सवहरु मध्ये भगवान श्रीविष्णुले १५ दिन पिण्डेश्वरको आराधना गरेर उत्सव मनाएको कारण पनि यो रथोत्सव गर्न लागिएको श्रीपिण्डेश्वर बाबाधाम समितीका अध्यक्ष विकासकुमार बनेपालीले जानकारी दिए ।
रुद्राक्षारण्य महात्म्यको अध्याय १६ को ४९, ५० र ५१ श्लोकमा भगवान विष्णुले चैत्र शुक्ल प्रतिपदादेखि पूर्णिमा सम्म पिण्डेश्वर महादेवको पुजा अर्चना गरेर रथोत्सव गरेकाे वर्णन छ । पूर्णिमाका दिन शिवगंगा (शिवजट्टा)मा गएर रथोत्सव समापन गरि भगवान श्रीहरि वैकुण्ठ प्रस्थान गरेकाे उक्त महात्म्यमा उल्लेख रहेको छ ।
भगवान विष्णुले समेत यहाँ आएर १५ दिनसम्म उत्सव गर्नु भएको कारण यो कार्यक्रम गर्नु परेको बनेपालीले जानकारी दिए । यस्तो उत्सव यस अघिनै हुनु पर्ने भएता पनि अहिले आएर आयोजना हुनु खुसीको कुरा रहेको जगद्गुरु बालसन्त मोहनशरण देवाचार्यले बताए ।
यस्ता कार्यहरुले तीर्थस्थलहरुको महत्वमा श्रीवृद्धि हुने र मठ मन्दिरहरुमा धार्मिक गतिविधी भइरहन सघाउ पु-याउने पनि जगद्गुरुले विश्वास व्यक्त गरे । यो रथोत्सवले आसन्न कोशी प्रदेश पर्यटन वर्षलाई पनि सघाउ पु¥याउने कोशी पर्यटन वर्ष निर्देशन समितिका सदस्य वासुदेव बरालले बताए ।
कोशी प्रदेशको पर्यटनको मेरुदण्ड धार्मिक पर्यटन नै भएका कारण यस्ता गतिविधीले पर्यटकहरुलाई आकर्षित गर्न सक्नेमा आफ्नो विश्वास रहेको पनि बरालले बताएका छन् ।
धरानको श्रीपिण्डेश्वर मन्दिरमा आयोजना हुने रथोत्सवमा चैत्र १७ गतेदेखि प्रत्येक दिन रुद्री पाठ अनुष्ठान, भगवानको विशेष पुजा अर्चना एवं प्रत्येक साँझ भजन किर्तन हुने छ । त्यस्तै १७ गते दिन विजयपुरका दन्तकाली, पञ्चकन्या, बुढासुब्बा हुदै पिण्डेश्वरसम्म रथयात्रा हुने छ ।
यसैगरी रथयात्राले चैत्र २२ गते दन्तकाली मन्दिर परिक्रमा गर्ने २३ गते बुढासुब्बा र पञ्चकन्या मन्दिर परिक्रमा गर्ने र चैत्र ३० गते धरान बजार परिक्रमा गरेर शिवजट्टामा समापन गरिने श्रीपिण्डेश्वर बाबाधाम समितिले जानकारी दिएको छ ।
Discussion about this post