इटहरी : कोशी प्रदेशका तीन जिल्लामा ट्रान्सफर्मर चोरीको घटना दिनप्रतिदिन बढ्दै गएको छ। सुनसरी, मोरङ र झापामा मात्रै पछिल्लो एक वर्षमा २२ वटा ट्रान्सफर्मर चोरी भएका छन्।
नेपाल विद्युत् प्राधिकरण र प्रहरीको तथ्याङ्क अनुसार सबैभन्दा बढी चोरी सुनसरीमा भएको छ। सुनसरीमा १२ वटा, मोरङमा ८ वटा र झापामा २ वटा ट्रान्सफर्मर चोरी भएका छन्।
सुनसरीमा साउन ६ गते बराहक्षेत्र–४ जमटोकीमा र साउन ९ गते देवानगञ्ज गाउँपालिका–१ मध्यहर्षाही राजाजीथानमा ट्रान्सफर्मर चोरी भएको छ। त्यसअघि जेठ महिनामा ३ वटा, असार २ गते २ वटा र चैत २४ गते १ ट्रान्सफर्मर चोरी भएको थियो।
उता, मोरङमा जेठ २१, २२ र २३ गते क्रमशः ग्रामथान–६ झप्टा, रङ्गेली–७ हराङकालिका र रङ्गेली–१ जिरायत टोलमा ३ ट्रान्सफर्मर चोरी भएका थिए। झापामा चोरी भएका २ ट्रान्सफर्मर भने बस्ती नभएका सिँचाइ योजनाका लाइनहरूमा जडान गरिएको क्षेत्रबाट हराएका थिए।
नेपाल विद्युत् प्राधिकरण कोशी प्रदेश प्रमुख राजीव सिंहका अनुसार ग्रामीण क्षेत्रमा जडान गरिएका ट्रान्सफर्मर लक्षित गरी चोरीका घटना बढिरहेका छन्।
उनले भने, “लगातार चोरी भइरहेपछि प्रदेश प्रहरी कार्यालय विराटनगरमा उजुरी दिएका छौँ।”
प्राविधिक तरिकाबाट चोरी, तामाको लोभ मुख्य कारण
प्राधिकरणका अनुसार चोरहरूले ११ हजार भोल्टको लाइन सर्ट गरेर काट्ने र ट्रान्सफर्मर भित्रको तामाको क्वाइल निकाल्ने उद्देश्यले चोरी गर्ने गरेका छन्। चोरी भएका ट्रान्सफर्मर अधिकांश ५० केभी र १०० केभी क्षमताका थिए।
५० केभीको ट्रान्सफर्मरको मूल्य ५–६ लाख र १०० केभीको मूल्य ११–१२ लाख रुपैयाँ पर्ने प्राधिकरणले जनाएको छ। यसरी २२ वटा ट्रान्सफर्मर चोरी हुँदा प्राधिकरणलाई करिब २ करोड २० लाख रुपैयाँभन्दा बढीको क्षति पुगेको छ।
चोरीको घटनामा संलग्न समूह पहिचान गरी चोरी नियन्त्रण गर्नुका साथै ट्रान्सफर्मरको सुरक्षा प्रणालीमा सुधार आवश्यक देखिएको जानकारहरू बताउँछन्।
Discussion about this post