इटहरी : कोशी प्रदेश सहकारी तथा प्रशिक्षण कार्यालय इनरुवाले इटहरी उपमहानगरपालिका-१ स्थित कामधेनु दुग्ध विकास सहकारी संस्था लिमिटेडलाई सेयर सदस्यताबाट हटाइएका कृष्णप्रसाद अधिकारी र मनोज दाहालको सदस्यता कायम गर्न निर्देशन दिएको छ।
प्रदेश सहकारी नियमावली २०७६ को नियम १२ (१) क, ख र ग बमोजिम अवलम्बन गर्नुपर्ने प्रक्रिया पूरा भएको प्रमाण तोकिएको समयसीमाभित्र पेस नगरिएकाले दुवै सदस्यको सदस्यता कायम गर्न निर्देशन दिएको हो।
प्रदेश सहकारी कार्यालयका रजिस्ट्रार भूपेन्द्र खनालद्वारा जारी पत्रअनुसार कामधेनु सहकारीले आवश्यक कागजात तथा प्रमाण समयमै नबुझाएकाले उक्त निर्णय गरिएको उल्लेख छ। रजिस्ट्रार खनालले गत बिहीबार सहकारीलाई औपचारिक निर्देशन पत्र पठाएका हुन्।
सहकारी ऐन तथा नियमावलीअनुसार आवश्यक प्रक्रिया पूरा नगरी सदस्यता खारेज गरिएको ठहर भएमा संस्थामाथि थप कानुनी कारबाही हुन सक्ने कार्यालयले संकेत गरेको छ।
कामधेनु सहकारीको मंसिर १२ गते बसेको सञ्चालक समितिको बैठकले ‘भ्रामक तथा तथ्यहीन समाचार सम्प्रेषण गरेको’ आरोप लगाउँदै अधिकारी र दाहाललाई सेयर सदस्यताबाट हटाउने निर्णय गरेको थियो। सो निर्णयविरुद्ध मंसिर २४ गते प्रदेश सहकारी रजिस्ट्रार कार्यालयमा निवेदन दर्ता भएको थियो।
निष्कासित सदस्यहरूले अध्यक्ष यादप ढकालले मनोमानी र पूर्वाग्रही ढंगले निर्णय गरेको आरोप लगाउँदै संघीय सहकारी कानुन, ऐन र विनियमअनुसार प्रक्रिया नपुगेको दाबी गरेका थिए।
अधिकारी कामधेनु सहकारीका संस्थापक सदस्य तथा तीन कार्यकाल अध्यक्ष रहिसकेका व्यक्ति हुन्। अध्यक्ष ढकालले व्यक्तिगत रिसइबी राखेर संस्था सञ्चालन गरेको, गैरकानुनी र गैरजिम्मेवार तरिकाले पूर्वाग्रह राखेर आफूहरूलाई साधारण सदस्यबाटै हटाइएकोमा उनीहरूले आपत्ति जनाएका थिए ।
आन्तरिक विवाद र आरोप-प्रत्यारोप
यसैबीच कामधेनु सहकारीसँग सम्बन्धित एक कर्मचारीको मृत्यु प्रकरणपछि संस्थाको आन्तरिक गतिविधि र व्यवस्थापन शैलीबारे समेत प्रश्न उठ्न थालेपछि दुवैजनालाई सेयर सदस्यबाट हटाइएको थियो।
कर्मचारीको मृत्यु घटनासँग जोडिएका विषयहरू सार्वजनिक भएपछि सहकारीभित्रका केही गतिविधि विवादमा तानिएको बताइन्छ।
संस्थाका कर्मचारी प्रेम मिश्रले सहकारीका सञ्चालनमा भएका अनियमितता, बलजफ्ती, दबाब, प्रभाव र मानसिक यातना र मनोवैज्ञानिक दवाब दिएको भन्दै ‘सुसाइट नोट’ लेखेर आत्महत्या गरेका थिए ।
उक्त नोट सार्वजनिक भए सहकारीको छवि प्रभावित हुने डर देखाउँदै अध्यक्ष ढकालसहितका पदाधिकारीले आन्तरिक सल्लाह गरी सेयर सदस्यबाट हटाइएको बताइएको थियो ।
गत १७ कात्तिकमा कर्मचारी मिश्रले संस्थाकै दुई जना कर्मचारीको नाम उल्लेख गरी आत्महत्या गरेपनि उक्त घटनालाई सामसुम पार्ने प्रयास गरियो । अध्यक्ष ढकालले मिश्रको काममा असन्तुष्टि जनाउँदै केही स्पष्टीकरण सोधेका थिए । संस्थाबाट पटकपटक दबाब दिइएको र मानसिक यातना दिइएकाले मिश्रले आत्महत्या गरेको पीडित परिवारले जनाएका छन् ।
मिश्रले संस्थाका बजार प्रमुख रञ्जित झा र शेरबहादुर खड्काको नाम उल्लेख गर्दै ‘सुसाइट नोट’लेखेका थिए ।
मिश्रको निधनपछि अध्यक्ष ढकालसहित अन्य कर्मचारीहरू समवेदना दिन झापास्थित घर गएका थिए ।
त्यस क्रममा स्थानीयले उनीहरूलाई दुव्र्यवहार गरे । फर्किने क्रममा मोरङस्थित पथरीको जङ्गलमा आइपुगेपछि सँगै गएका सबैको मोबाइल फोन ढकालले नै नियन्त्रणमा लिएर सोधपुछ गरी मानसिक यातना दिएको घटनासमेत सार्वजनिक भएको थियो ।
विभिन्न घटालाई लिएर ढकाल आफैँले सेयर सदस्य र कर्मचारीहरूलाई आरोप-प्रत्यारोपमा उत्रिने गरेको स्रोतको दाबी छ ।
संस्थामा हाल १ हजार ६ सयभन्दा बढी सेयर सदस्य र दैनिक ११ हजारभन्दा बढी कृषक आबद्ध रहेका छन्।
दुग्धजन्य पदार्थको ठूलो कारोबार हुँदै आए पनि आन्तरिक विवाद र सीमित व्यक्तिको स्वार्थका कारण सहकारीको भविष्य जोखिममा पर्न सक्ने भन्दै सदस्यहरूले चिन्ता व्यक्त गरेका छन्।
यो पनि – कामधेनु सहकारीले रजिस्ट्रार कार्यालयलाई बुझायो जवाफ, प्रक्रिया नपुगे कारबाही हुने संकेत
यो पनि – कामधेनु सहकारीको विवाद उत्कर्षमा, सेयर सदस्य निष्कासनपछि रजिष्ट्रार कार्यालयले माग्यो जवाफ
यो पनि – कर्मचारी आत्महत्या प्रकरणमा घेरिएपछि कामधेनु सहकारीद्वारा पत्रकारलाई खाममा पैसा !
Discussion about this post