इटहरी : मोरङ र सुनसरीका विभिन्न स्थानबाट प्रहरीले प्रतिबन्धित लागूऔषधसहित एक फार्मेसी सञ्चालिका तथा गाँजासहित दुई जनालाई पक्राउ गरेको छ।
सुनसरीको गढी गाउँपालिका–२ औरावनी चोकबाट मोरङको सुन्दरहरैँचा नगरपालिका–८ घर भई हाल सोही स्थानमा डेरा गरी बस्दै आएकी ३२ वर्षीया मोनिका चौधरी पक्राउ परेकी हुन्।
उनले सटर भाडामा लिएर सञ्चालन गर्दै आएको शिवमहिमा मेडिकल हल फार्मेसीमा प्रतिबन्धित लागूऔषध बिक्री–वितरण भइरहेको भन्ने विशेष सूचनाका आधारमा कोशी प्रदेश प्रहरी कार्यालय विराटनगरको प्रादेशिक अनुसन्धान समूह र इलाका प्रहरी कार्यालय दुहबीबाट खटिएको टोलीले खानतलासी गरेको थियो।
खानतलासीका क्रममा फार्मेसीमा लुकाईछिपाई राखिएको ट्रामाडोल र स्पास्पेन गरी जम्मा २ हजार ९ सय ३० ट्याब्लेट बरामद भएपछि चौधरीलाई नियन्त्रणमा लिइएको प्रहरीले जनाएको छ।
यसैगरी विराटनगर–३ बरगाछी चोकबाट भारत अररिया निवासी पृथ्वी कुमार सिंह र कृष्ण कुमार सिंहलाई ११ किलो ५२ ग्राम गाँजासहित जिल्ला प्रहरी कार्यालय मोरङले पक्राउ गरेको छ।
पक्राउ परेका उनीहरूमाथि थप अनुसन्धान भइरहेको प्रहरीले जनाएको छ।
Discussion about this post