विराटनगर : कोशी प्रदेशका मुख्यमन्त्री हिक्मतकुमार कार्कीले प्रदेशको आर्थिक चलायमानका लागि निजी क्षेत्रलाई साथ लिएर अगाडि बढ्ने बताएका छन्।
नेपाल उद्योग वाणिज्य महासंघ कोशी प्रदेशद्वारा बिहीवार विराटनगरमा आयोजित चौथो कार्यकारिणी समितिको पदस्थापन समारोह उद्घाटन गर्दै उनले निजी क्षेत्रलाई डर र त्रास नदेखाई सुरक्षाको प्रत्याभूति दिँदै प्रदेशको समृद्धिका लागि सहकार्य गरिने प्रतिबद्धता व्यक्त गरे।
मुख्यमन्त्री कार्कीले वर्तमान दुई तिहाइको सरकार गठनसँगै मुलुकमा राजनीतिक स्थिरता कायम हुने र नेपाली जनताले राहतको महसुस गर्ने विश्वास व्यक्त गरे। उनले आगामी वर्षको प्रदेश बजेट उपलब्धिमूलक क्षेत्रमा विनियोजन गर्न निर्देशन दिएको जानकारी दिए।
उनले विकास भनेको सडक र पुल निर्माण मात्र नभई सूचना प्रविधि र पर्यटन क्षेत्रको विकास पनि भएको उल्लेख गर्दै ती क्षेत्रमा लगानी गर्न निजी क्षेत्रलाई आग्रह गरे।
मुख्यमन्त्री कार्कीका अनुसार प्रदेश सरकारले आगामी आर्थिक वर्ष २०८३।८४ र २०८४।८५ लाई भ्रमण वर्षका रूपमा घोषणा गर्ने तयारी गरेको छ।
प्रदेशको कृषि उत्पादन निर्यातमार्फत आर्थिक गतिविधि बढाउने उद्देश्यले आगामी भदौमा नेपालस्थित विदेशी कूटनीतिज्ञहरूसँग छलफल कार्यक्रम आयोजना गरिने पनि उनको भनाइ छ।
विराटनगर महानगरपालिकाका प्रमुख नागेश कोइरालाले महानगर उद्योगी–व्यवसायीहरूको हितमा काम गर्ने प्रतिबद्धता व्यक्त गरे।
महासंघका कोशी प्रदेश अध्यक्ष राजेन्द्रबहादुर राउतले स्थिर सरकार र राजनीतिक स्थिरताले जलविद्युत्, पर्यटन, उद्योग तथा कृषिको विकासमार्फत आर्थिक चलायमानता र समृद्धि कायम हुने विश्वास व्यक्त गरे।
Discussion about this post