इटहरी : उद्योग वाणिज्य संघ (उवासंघ) इटहरीको नयाँ नेतृत्व चयनका लागि शनिबार (भोलि) हुने निर्वाचनले स्थानीय व्यवसायिक वृत्तको ध्यान तानेको छ।
अध्यक्ष पदका लागि नवराज काफ्ले र गायत्री कटुवाल भण्डारीबीच प्रतिस्पर्धा हुनेछ। यसपटकको चुनावलाई प्रतिस्पर्धात्मक मानिएको छ।
दुवै उम्मेदवारले चुनावी अभियानका क्रममा व्यवसायीका साझा समस्या समाधान, संघको प्रभावकारिता वृद्धि र व्यवसायमैत्री वातावरण निर्माणलाई मुख्य एजेन्डा बनाएका छन्। दुवैले घरदैलो, भेटघाट र छलफलमार्फत मतदातासँग अन्तिम चरणको चुनावी अभियान गरेका छन्।
गायत्री कटुवाल भण्डारी उद्योग वाणिज्य संघ इटहरीकी पूर्व कोषाध्यक्ष तथा रेडिमेड व्यवसायी संघ इटहरीकी संस्थापक अध्यक्ष हुन्।
उनी यसपटक निर्वाचित भए उद्योग वाणिज्य संघ इटहरीको इतिहासमै पहिलो महिला अध्यक्ष बन्नेछिन्। भण्डारीले संघमा पारदर्शिता, महिला नेतृत्वको सशक्त उपस्थिति र व्यवहारिक सुधारका एजेन्डा अघि सारेकी छन्।
अघिल्लो निर्वाचनको अनुभवले आफूलाई अझ परिपक्व बनाएको उनको भनाइ छ। उनलाई नेकपा माओबादी र राष्ट्रिय स्वतन्त्र पार्टी (रास्वपा)मा आबद्ध व्यवसायीहरूले समर्थन गरेका छन्। यद्यपि, उनी कांग्रेस पृष्ठभूमिकी हुन्।
उता नवराज काफ्ले भने उद्योग वाणिज्य संघका लगातार तीन कार्यकाल निर्वाचित कार्यसमिति सदस्य हुन्।
इट्टा उद्योग, होटल, कृषि तथा व्यापार क्षेत्रमा लामो अनुभव भएका काफ्लेले संघलाई डिजिटल प्रविधिमैत्री बनाउने, सदस्यता नवीकरणलाई अनलाइन प्रणालीमा लैजाने, रात्रिकालीन बजार प्रवर्द्धन, व्यवसायी–सरकार समन्वय तथा लगानीमैत्री वातावरण निर्माणलाई आफ्नो प्रमुख प्राथमिकता बनाएका छन्।
यसअघि भवन निर्माण समितिको कोषाध्यक्ष भएरसमेत काम गरिसकेका काफलेलाई नेपाली कांग्रेस र नेकपा एमालेमा आबद्ध व्यवसायीहरूले समर्थन गरेका छन्। उनी पनि कांग्रेस पृष्ठभूमिकै हुन्।
खासगरी व्यवसायिक वृत्तमा दुवै उम्मेदवारको पक्षमा आ–आफ्नै दाबी भइरहेका छन्।
एक पक्षले काफ्लेको संगठन, लामो संस्थागत अनुभव र संयुक्त प्यानललाई बलियो आधार मानिरहेको छ भने अर्को पक्षले भण्डारीप्रतिको व्यक्तिगत विश्वास, महिला नेतृत्वको अपेक्षा र स्वतन्त्र छवाले मतदाता आकर्षित गर्न सक्ने आकलन गरिरहेको छ।
यद्यपि निर्वाचनको परिणामबारे अहिले नै निश्चित निष्कर्ष निकाल्न सकिने अवस्था छैन। दुवै पक्षले आफ्नो जित सुनिश्चित भएको दाबी गरिरहेका छन्। अन्तिम निर्णय भने शनिबार मतपेटिकाबाट आउने जनमतले गर्नेछ।
उद्योग वाणिज्य संघ इटहरीको निर्वाचनमा यसपटक कुल २ हजार ३ सय ६५ मतदाता रहेका छन् ।
Discussion about this post