इटहरी : उद्योग वाणिज्य संघ इटहरीको नयाँ नेतृत्व चयनका लागि शनिबार हुने निर्वाचनअघि अध्यक्षका उम्मेदवार नवराज काफ्ले नेतृत्वको साझा समूहले व्यवसायीको हितलाई केन्द्रमा राख्दै आठबुँदे प्रतिबद्धतापत्र सार्वजनिक गरेको छ।
समूहले ‘दिन–रात व्यवसायीको साथ’ भन्ने मूल सन्देशसहित संघलाई व्यवसायीको साझा, समावेशी र पूर्ण डिजिटल संस्थाका रूपमा विकास गर्ने योजना अघि सारेको हो।
शुक्रबार आयोजित पत्रकार सम्मेलन गरी सार्वजनिक गरिएको प्रतिबद्धतापत्रमा उद्योग वाणिज्य संघलाई कुनै पनि राजनीतिक, सामाजिक, लैङ्गिक वा आर्थिक विभाजनबाट मुक्त राख्दै सम्पूर्ण व्यवसायीको साझा संस्थाका रूपमा सञ्चालन गर्ने प्रतिबद्धता व्यक्त गरिएको छ।
समूहले निर्वाचनलाई राजनीतिक प्रतिस्पर्धाभन्दा पनि व्यवसायीको साझा भविष्य निर्माण गर्ने अवसरका रूपमा लिनुपर्ने धारणा राख्दै हार–जितपछि पनि सबै व्यवसायीबीच सहकार्य र सहअस्तित्व कायम राखेर संस्थालाई थप सशक्त बनाइने जनाएको छ।
प्रतिबद्धतापत्रमा व्यवसायीलाई समस्या पर्दा जुनसुकै समयमा पनि संघका पदाधिकारी प्रत्यक्ष रूपमा उपस्थित भई समन्वय र सहजीकरण गर्ने ‘दिन–रात व्यवसायीको साथ’ अभियान सञ्चालन गरिने उल्लेख छ।
त्यसैगरी, अनावश्यक बजार बन्द गर्ने परम्पराको अन्त्य गर्दै निर्भय वातावरणमा व्यापार–व्यवसाय सञ्चालन गर्ने, इटहरीमा राष्ट्रिय तथा अन्तर्राष्ट्रिय व्यापार मेला, प्रदर्शनी तथा लगानी सम्मेलन आयोजना गरी व्यापार प्रवर्द्धन गर्ने योजना पनि सार्वजनिक गरिएको छ।
समूहले ‘मुठीदेखि मोबाइलसम्म’को अवधारणाअनुसार उद्योग वाणिज्य संघलाई पूर्ण रूपमा डिजिटल बनाउने घोषणा गरेको छ।
यसअन्तर्गत मोबाइल एपमार्फत सदस्यता नवीकरणदेखि सेवा प्रवाहसम्मका काम घर वा पसलबाटै गर्न सकिने व्यवस्था मिलाइने, साथै डिजिटल मार्केटिङ र ई–कमर्ससम्बन्धी तालिम सञ्चालन गरिने जनाइएको छ।
घरबहाल करको दीर्घकालीन समाधानका लागि स्थानीय सरकारसँग समन्वय गरी घरधनीले नै घरबहाल कर तिर्ने व्यवस्था मिलाउन पहल गरिने, भ्याट तथा करसम्बन्धी समस्या समाधानका लागि राजस्व कार्यालयसँग सहकार्यमा नियमित तालिम सञ्चालन गरिने प्रतिबद्धता पनि समेटिएको छ।
प्रतिबद्धतापत्रमा इटहरीलाई सूचना प्रविधि (आईटी), नवप्रवर्तन र स्टार्टअप व्यवसायको केन्द्रका रूपमा विकास गर्न लगानीकर्ता भित्र्याउने, बैंक तथा सरकारी निकायसँग साझेदारी गरी नयाँ उद्यमलाई प्रवर्द्धन गर्ने तथा युवालाई उद्यमशीलतामा जोड्ने कार्यक्रम सञ्चालन गरिने उल्लेख छ।
महिला उद्यमशीलतालाई विशेष प्राथमिकता दिँदै डिजिटल मार्केटिङ, वित्तीय व्यवस्थापन र कर प्रणालीसम्बन्धी तालिम सञ्चालन गर्ने, महिला उद्यमीको वित्तीय पहुँच विस्तार गर्ने तथा क्षमता अभिवृद्धिका कार्यक्रम सञ्चालन गरिने पनि समूहले जनाएको छ।
पत्रकार सम्मेलनमा उद्योग वाणिज्य संघ इटहरीका वर्तमान अध्यक्ष जीवन पराजुलीले आफ्नो कार्यकालमा पूरा हुन नसकेका योजनालाई काफ्ले नेतृत्वको समूहले निरन्तरता दिँदै पूरा गर्ने विश्वास व्यक्त गरे।
अध्यक्षका लागि काफ्ले र गायत्री कटवाल भण्डारी प्रतिस्पर्धामा छन्। संघको निर्वाचनका लागि कुल २ हजार ३ सय ६५ मतदाता छन्।
Discussion about this post