धरान : बीपी कोइराला स्वास्थ्य विज्ञान प्रतिष्ठान धरानमा कोशी प्रदेशमा प्यालियेटिभ तथा हस्पिस केयर (प्रशामक सेवा) विस्तार गर्ने उद्देश्यले पाँचदिने ‘इन्टिग्रेटेड प्यालियेटिभ एन्ड हस्पिस केयर एसेन्सियल्स’ कार्यशाला सुरु भएको छ।
दीर्घरोगीका लागि आवश्यक प्रशामक सेवाको पहुँच विस्तार गर्ने उद्देश्यले आयोजना गरिएको कार्यशाला सोमबारदेखि सुरु भएको हो। कार्यशाला नेपाल हस्पिस केयर सेन्टरको आयोजनामा तथा बीपी प्रतिष्ठानको स्टुडेन्ट्स अन्कोलोजी विङको संयोजनमा भइरहेको छ।
कार्यशालामा टु वर्ल्ड्स क्यान्सर कोल्याबोरेसन (क्यानडा), रोटरी इन्टरनेसनल, रोटरी क्लब अफ काठमाडौँ काष्ठमण्डप, बीपी प्रतिष्ठान, कोशी प्रदेशको सामाजिक विकास मन्त्रालय र धरान उपमहानगरपालिकाको सहयोग रहेको छ।
उद्घाटन कार्यक्रममा प्रतिष्ठानको इन्टरनल मेडिसिन विभागका प्रमुख प्रा. डा. रोबिन मास्केले स्वागत गरेका थिए भने मेडिकल अन्कोलोजी युनिटकी इन्चार्ज तथा मेडिकल अन्कोलोजिस्ट डा। सोनिया दुलालले कार्यशालाको उद्देश्य र रूपरेखा प्रस्तुत गरेकी थिइन्।
डा. विष्णु श्रेष्ठले प्यालियेटिभ तथा हस्पिस केयरको अवधारणाबारे जानकारी दिएका थिए। प्रतिष्ठानकी उपकुलपति प्रा. डा. स्मृति कार्कीले कार्यशालाको औपचारिक उद्घाटन गरेकी थिइन्।
कार्यक्रममा प्रतिष्ठानका निमित्त अस्पताल निर्देशक डा. इन्द्रकुमार लिम्बू, निवर्तमान उपकुलपति प्रा. डा. विक्रमप्रसाद श्रेष्ठ, निवर्तमान रेक्टर प्रा. डा. सञ्जीवकुमार शर्मा, विभिन्न विभाग तथा शाखाका प्रमुख, शिक्षक, कर्मचारी र विद्यार्थीको उपस्थिति थियो।
कार्यशालामा नेपाल हस्पिस केयर सेन्टर तथा नेपाल एसोसिएसन अफ प्यालियेटिभ केयरका अध्यक्ष प्रा. डा. विष्णुदत्त पौडेल, भक्तपुर क्यान्सर अस्पतालका चिकित्सक तथा नर्स, स्वास्थ्य मन्त्रालयकी प्रतिनिधि, धरान उपमहानगरपालिकाका प्रतिनिधि, रोटरी क्लबका प्रतिनिधि तथा भारत र कोशी प्रदेशका विभिन्न अस्पतालबाट आएका स्वास्थ्यकर्मी सहभागी छन्।
उद्घाटनपछि उपकुलपति प्रा. डा. कार्कीले ‘बीपीकेआईएचएसको पूर्वी नेपालमा प्यालियेटिभ केयर सुदृढीकरण तथा विस्तारमा भूमिका’ विषयमा प्रस्तुति दिइन्। प्रा. डा. पौडेलले ‘आवश्यक प्यालियेटिभ केयर प्याकेज र चार स्तम्भमा आधारित प्यालियेटिभ केयर इकोसिस्टम’ विषयमा प्रस्तुति दिए।
त्यस्तै पूर्वरेक्टर प्रा. डा. सञ्जीवकुमार शर्माले स्वास्थ्य प्रणालीमा प्यालियेटिभ केयर एकीकरणका रणनीतिबारे प्रस्तुति दिएका थिए। डा. सोनिया दुलाल र प्रतिष्ठानकी प्यालियेटिभ केयर नर्स रोजिता शाक्यले धरानमा बीपी प्रतिष्ठानले सञ्चालन गरेको घरमै आधारित हस्पिस केयर सेवाको प्रभावबारे प्रस्तुति दिए।
कार्यक्रमको अन्तिम सत्रमा ‘प्यालियेटिभ केयर नीतिगत ढाँचा, चुनौती, सोच तथा प्रदेश र स्थानीय सरकारको प्रतिबद्धता’ विषयमा प्यानल छलफल गरिएको थियो।
पाँच दिनसम्म सञ्चालन हुने कार्यशालाले कोशी प्रदेशमा क्यान्सर तथा अन्य दीर्घरोगबाट प्रभावित बिरामीका लागि अस्पतालमा मात्र नभई समुदाय र घरमै समेत आवश्यक प्रशामक सेवा विस्तार गर्न स्वास्थ्यकर्मीको क्षमता विकासमा जोड दिने आयोजकले जनाएको छ।
Discussion about this post