उदयपुर । उदयपुरको ताप्ली गाउँपालिकाले भोटेकोशी बाढी पीडितका लागि प्रधानमन्त्री राहत कोषमा १९ लाख ४० हजार ८२७ रुपैयाँ आर्थिक सहयोग गर्ने निर्णय गरेको छ । भोटेकोशी बाढी पीडित नागरिकको उद्धार, राहत तथा पुनःस्थापनाका लागि गाउँपालिकाले प्रधानमन्त्री राहत कोषमा रकम जम्मा गर्ने निर्णय गरेको हो ।
गाउँ कार्यपालिकाको भदौ १७ गते बसेको बैठकको निर्णय अनुसार प्रेस विज्ञप्ति मार्फत सार्वजनिक गर्दै स्थानीय विपद् कोषबाट ५ लाख रुपैयाँ, जनप्रतिनिधिहरूको तर्फबाट १ लाख ६५ हजार ५०० रुपैयाँ, गाउँपालिकामा कार्यरत कर्मचारीबाट ५ लाख ६६ हजार ३६० रुपैयाँ सहयोग गर्ने निर्णय गरिएको छ ।
गाउँपालिका अध्यक्ष ढुंगराज विश्वकर्मा र प्रमुख प्रशासकीय अधिकृत सन्तोष भट्टराईद्वारा संयुक्त रुपमा जारी विज्ञप्तिमा गाउँपालिका अन्तर्गतका विद्यालयका शिक्षक तथा कर्मचारीबाट ७ लाख ८ हजार ९६७ रुपैयाँ संकलन गर्ने निर्णय गरी १९ लाख ४० हजार ८२७ रुपैयाँ प्रधानमन्त्री दैविक उद्धार कोषमा जम्मा गर्ने उल्लेख छ ।
विपद्को यस कठिन घडीमा सहयोग, समन्वय, ऐक्यबद्धता र सामूहिक हातेमालोका लागि देश–विदेशमा रहेका नेपाली, जनप्रतिनिधि, राजनीतिक दल, समाजसेवी, बुद्धिजीवी तथा विभिन्न संघसंस्थालाई सहयोगका लागि आह्वान गरिएको जानकारी अध्यक्ष ढुंगराज विश्वकर्माले जानकारी दिनु भयो ।
विज्ञप्तिमा भदौ १० गते रसुवा जिल्लाको सीमा क्षेत्र रसुवागढी तथा तल्लो तटीय क्षेत्र भोटेकोशी नदीमा आएको भीषण बाढीबाट भएको जनधनको क्षतिप्रति दुःख व्यक्त गर्दै मृतकप्रति भावपूर्ण श्रद्धाञ्जली अर्पण गरिएको छ । साथै शोकसन्तप्त परिवारजनप्रति हार्दिक समवेदना व्यक्त गर्दै घाइतेहरूको शीघ्र स्वास्थ्यलाभको कामना गरिएको छ ।
Discussion about this post