इटहरी : रसुवाको भोटेकोशी क्षेत्रमा भएको भीषण विपत्तिमा दिवंगत भएकाहरूको चिरशान्तिको कामना तथा बेपत्ता भएकाहरूको सकुशल खोजीका लागि सुनसरीका विभिन्न स्थानमा धार्मिक पाठ तथा प्रार्थना गरिएको छ ।
सरकारले सोमबार भोटेकोशी विपत्तिमा ज्यान गुमाएकाहरूको स्मरणमा राष्ट्रिय शोक दिवस घोषणा गरेसँगै ब्राह्मण समाज नेपाल सुनसरी र वैदिक कर्मकाण्ड परिषद् सुनसरीको आयोजनामा जिल्लाका विभिन्न मन्दिरमा सामूहिक धार्मिक पाठ गरिएको हो ।
धरानस्थित गीता भवनमा ब्राह्मण समाज तथा वैदिक कर्मकाण्ड परिषद्का सदस्यले सामूहिक रूपमा श्रीमद्भागवत, श्रीमद्भगवद्गीता, पञ्चसूक्त, विष्णु सहस्रनाम र गजेन्द्र मोक्ष पाठ तथा जप गरेका थिए ।
त्यसैगरी इटहरीको आँपगाछी, खनारको शिव मन्दिर, झुम्का, इनरुवाको मधेसा तथा बराहक्षेत्रलगायतका स्थानमा पनि धार्मिक पाठ तथा प्रार्थना गरिएको आयोजकले जनाएको छ ।
पाठका क्रममा विपत्तिमा परी दिवंगत भएकाहरूको आत्माको चिरशान्तिको कामना गर्दै मौनधारणसमेत गरिएको थियो । साथै बेपत्ता भएकाहरूको सकुशल खोजी तथा प्रभावित परिवारमा धैर्यधारण गर्ने शक्ति प्राप्त होस् भन्ने कामना गरिएको थियो ।
यसैबीच सोमबार साँझ इटहरीको तरहरास्थित शिव मन्दिरमा दिवंगतहरूको स्मृतिमा दीप प्रज्वलनसमेत गरिएको आयोजकले जनाएको छ ।
Discussion about this post