इटहरी : ‘धानसुक्यो रापले फकाउँछ काफ्ले जानु कि नजानु’ गीतका सर्जक युवराज काफ्लेसहितको टिमले नेपाली कथानक चलचित्र निर्माण गर्ने भएको छ। ‘अल्बेस्रो’ पात्र अर्थात् ‘बखते’लाई कथाको मुख्य केन्द्रमा राखेर निर्माण हुन लागेको चलचित्रको शुक्रबार शुभमुहूर्त गरिएको हो।
ललितपुरको महालक्ष्मी मन्दिरमा चलचित्रको शुभमुहूर्त गर्दै निर्माण पक्षले औपचारिक रूपमा फिल्म निर्माणको घोषणा गरेको हो। चलचित्रको निर्माणमा फिल्म वितरक तथा फेण्डस् सिनेमाका सञ्चालक आशिष तामाङ, प्रदीप जी धामी र युवराज काफ्लेको लगानी रहनेछ।
चलचित्रको निर्देशन चर्चित फिल्म ‘जारी’का निर्देशक उपेन्द्र सुब्बाले गर्ने भएका छन्। आगामी सातादेखि काठमाडौंमा चलचित्रको छायांकन सुरु हुने गीतकार तथा फिल्म निर्माता काफ्लेले टाकुरा न्युजलाई जानकारी दिए।
चलचित्रमा विपिन कार्की र मिरुना मगर मुख्य भूमिकामा रहनेछन्। काफ्ले कार्यकारी निर्माताको भूमिकामा छन्। अनुराग कुँवर, शिशिर वाङ्देल, विनोद न्यौपाने, अनिल सुब्बा, उषाकिरण अधिकारी, शारदा गिरी, मिश्री थापा, सुगम दुलाल, सहिष्मा खड्का र अनिसा काफ्ले पनि कलाकारका रूपमा रहनेछन्। बालकलाकारका रूपमा रिन्जेन लामाले अभिनय गर्नेछन्।
शुभमुहूर्त कार्यक्रममा निर्देशक सुब्बाले आफूले निर्देशन गर्ने चलचित्रमा लामो अनुसन्धान र मेहनत गरेर कथालाई जीवन्त बनाउने तथा पात्रअनुसार कलाकार छनोट गर्ने बताए। उनले चलचित्र नेपाली फिल्म क्षेत्रमा उल्लेखनीय बन्ने र दर्शकले रुचाउने विश्वास व्यक्त गरे।
Discussion about this post