विराटनगर : कुनै समय संगठित अपराध, आर्थिक असुली र शोषणका कारण चर्चामा रहेको मोरङ कारागारमा अहिले सुधारको प्रयास थालिएको छ ।
कैदीबन्दी र बालसुधार गृहका बालविज्याइँकर्तालाई सकारात्मक सोच र व्यवहार परिवर्तनका लागि नियमित विपश्यना ध्यान अभ्यास गराउन थालिएको हो ।
मोरङका प्रमुख जिल्ला अधिकारी युवराज कट्टेलको पहलमा कारागारका पुरुष तथा महिला ब्लक र बालसुधार गृहमा दैनिक बिहान–बेलुका आनापाना ध्यान सञ्चालन भइरहेको छ । ध्यानसँगै नैतिक शिक्षा र सकारात्मक जीवनशैलीबारे समेत प्रशिक्षण दिइँदै आएको छ ।
कारागारभित्रको संगठित अपराध, आर्थिक शोषण र अनियमितता नियन्त्रण गर्ने प्रयासपछि कैदीबन्दीलाई सुधार र पुनःस्थापनासँग जोड्ने अभियान अघि बढाइएको प्रशासनले जनाएको छ ।
अब चाडपर्व सकिएपछि कारागारभित्रै १० दिने विपश्यना ध्यान शिविर सञ्चालन गर्ने तयारी गरिएको छ । त्यसका लागि करिब २५ लाख रुपैयाँको लागतमा छुट्टै संरचना निर्माण भइरहेको छ ।
शिविरमा एक पटकमा २४ जनालाई सहभागी गराएर क्रमशः सबै कैदीबन्दी तथा १८ वर्षमाथिका बालविज्याइँकर्तालाई समेट्ने योजना रहेको छ ।
कारागारलाई सजाय भोग्ने स्थानमा मात्र सीमित नराखी आत्मचिन्तन, व्यवहार परिवर्तन र सामाजिक पुनःस्थापनाको केन्द्र बनाउने उद्देश्यले ध्यान अभियान अघि बढाइएको प्रशासनको भनाइ छ ।
Discussion about this post