विराटनगर : कान, नाक र घाँटी (ईएनटी) उपचारमा प्रयोग भइरहेका नयाँ प्रविधि र शल्यक्रियाका विधिबारे चिकित्सकलाई व्यवहारिक ज्ञान दिने उद्देश्यले विराटनगर र इटहरीमा विशेषज्ञहरूको भेला हुने भएको छ ।
सोसाइटी अफ ओटोल्यारिङ्गोलोजिस्ट्स अफ नेपाल (एसओएल नेपाल)को दशौँ राष्ट्रिय सम्मेलनको अवसरमा मंसिर ४ गते शुक्रबार विराट मेडिकल कलेज टिचिङ हस्पिटलमा प्रत्यक्ष शल्यक्रिया कार्यशाला आयोजना गरिने भएको छ । त्यसको भोलिपल्टदेखि इटहरीमा दुईदिने राष्ट्रिय सम्मेलन सुरु हुनेछ ।
विराट मेडिकल कलेज र एसओएल नेपालको सहकार्यमा हुने कार्यशालामा कानको एन्डोस्कोपिक शल्यक्रिया, एडेनोटन्सिलेक्टोमी तथा ईएनटी उपचारमा बोटक्सको प्रयोगसम्बन्धी विधि प्रत्यक्ष प्रदर्शन गरिने आयोजकले जनाएको छ । कार्यशाला बिहान ९ बजे अस्पतालको छैटौँ तलास्थित केन्द्रीय सभाकक्षमा सुरु हुनेछ ।
कार्यशालामा इन्डोहोल्ड (जस्टट्याच) प्रविधिको प्रयोगसहित एन्डोस्कोपिक कान शल्यक्रियाको अभ्यास प्रदर्शन गरिनेछ । यसका साथै एन्डोस्कोपिक कोब्लेसन एडेनोटन्सिलेक्टोमी र ईएनटी उपचारमा बोटक्सको प्रयोगबारे पनि चिकित्सकलाई जानकारी दिइनेछ ।
कार्यशालापछि मंसिर ५ र ६ गते इटहरीस्थित रमदा होटलमा सम्मेलन हुनेछ ।
‘ईएनटी उपचारमा नवीनता, पहुँच र उत्कृष्टता’ भन्ने सन्देशसहित आयोजना हुने सम्मेलनमा २५० भन्दा बढी नेपाली तथा आठ जना विदेशी विशेषज्ञ चिकित्सक सहभागी हुने आयोजकको भनाइ छ । सम्मेलनमा १२० वटा कार्यपत्र प्रस्तुत गरिनेछन् ।
सम्मेलनले अनुभवी विशेषज्ञबीच ज्ञान आदानप्रदानसँगै युवा चिकित्सक र आवासीय चिकित्सकलाई आफ्नो सीप तथा अनुसन्धान प्रस्तुत गर्ने अवसरसमेत दिनेछ । उनीहरूका लागि सीप अभिवृद्धिसम्बन्धी कार्यशाला र पोस्टर प्रस्तुतीकरणका कार्यक्रम पनि राखिएका छन् ।
आयोजक समितिका सचिव डा. राजीव साहका अनुसार सम्मेलनले ईएनटी उपचारमा विकसित प्रविधि, उपचारको पहुँच र चिकित्सकीय अभ्यासका नयाँ पक्षबारे छलफल गर्ने अवसर प्रदान गर्नेछ ।
















Discussion about this post