उदयपुर । उदयपुर प्रहरीले जिल्लाका विभिन्न स्थानबाट ३८ महिनामा ४ हजार ३७६ दशमलव ५८४ किलोग्राम गाँजा बरामद गर्दा ९९ जनालाई पक्राउ गरेको छ ।
जिल्ला प्रहरी कार्यालय उदयपुरले आर्थिक वर्ष २०८०-०८१ देखि चालु आर्थिक वर्ष २०८३-०८४ को हालसम्मको दुई महिनाबीच उक्त परिमाणको गाँजा बरामद गर्दै ६४ वटा लागू औषधविरुद्धका मुद्दा दर्ता गरेको हो ।
जिल्ला प्रहरी कार्यालय उदयपुरका अनुसार ३८ महिना अर्थात् तीन वर्ष दुई महिनाको अवधिमा उक्त परिमाणको गाँजा बरामद गरी नष्टसमेत गरिएको छ । जिल्ला प्रहरी कार्यालय उदयपुरका सूचना अधिकारी गणेशबहादुर बमका अनुसार आर्थिकवर्ष २०८०-०८१ मा २४८ दशमलव ८५ केजी गाँजा बरामद गर्दा २७ जना पक्राउ परेका थिए । त्यस अवधिमा १८ वटा लागूऔषधविरुद्धका मुद्दा दर्ता गरिएको थियो ।
यसैगरी आर्थिक वर्ष २०८१-२०८२ मा एक हजा ७५३ केजी गाँजा बरामद गर्दा ३९ जना पक्राउ परेका थिए । त्यसमा २७ वटा मुद्दा दर्ता गरिएको थियो । गत आर्थिक वर्ष २०८२-२०८३ मा एक हजार ४८ दशमलव ४९९ केजी गाँजा बरामद गर्दा २८ जना पक्राउ परेका थिए । त्यसमा १६ वटा लागूऔषध विरुद्धका मुद्दा दर्ता गरिएको छ ।
यसै चालु आर्थिक वर्ष २०८३-०८४ को साउन र भदौमा मात्र १३ सय २७ किलोग्रामभन्दा बढी गाँजा बरामद गरी चारजनालाई पक्राउ गरिएको छ । पछिल्लो पटक सोमबार बिहान मात्र कटारी नगरपालिका–६ बाँकेटारस्थित शान्तिवनबाट प्रहरीले एक हजार एक सय २२ दशमलव ६७ किलोग्राम गाँजासहित तीनजनालाई पक्राउ गरेको थियो ।
जिल्ला प्रहरी कार्यालय उदयपुरका प्रमुख एसपी राजन चापागाईँका अनुसार शान्तिवन क्षेत्रमा खोजतलास गर्ने क्रममा जंगलभित्र लुकाइछिपाइ राखिएको अवस्थामा ५२ बोरामा प्याक गरिएको गाँजा बरामद भएको थियो । एसपी चापागाईँ भन्छन्, ‘पहाडी क्षेत्रबाट तराईतर्फ गाँजा ढुवानी हुने थाहा पाएपछि पछिल्लो समय एउटा गोप्य अभियान चलाएका छौँ । त्यसकै आधारमा दुई महिनाको बीचमा ठूलो परिमाणमा गाँजा बरामद गरी अनुसन्धान गरिरहेका छौँ ।’
Discussion about this post