इटहरी : इटहरीमा माओबादी केन्द्रले उम्मेदवारी फिर्ता लिएको छ ।
माओबादीले इटहरी उपमहानगरपालिकामा मेयर–उपमेयरसहित २० वटै वडामा उम्मेदवारी दिएको थियो । तर, आज (शुक्रबार) दिनभरको वार्तापछि गठबन्धनलाई सघाउनेगरी माओबादीले उम्मेदवारी फिर्ता लिएको हो ।
माओबादी केन्द्र प्रदेश १ का उपाध्यक्ष समेत रहेका इटहरी निवासी शिव डाँगीका अनुसार गठबन्धनको अस्तित्व जोगाउनका लागि मेयर–उपमेयरसहित सबै वडामा उम्मेदवारी फिर्ता लिइएको हो ।
‘हामीले गठबन्धनलाई जिताउने उदेश्यले केन्द्रको निर्देशन अनुसार उम्मेदवारी फिर्ता लिएका हौँ,’ डाँगीले टाकुरासँग भने, ‘भागबण्डाका आधारमा हामीले उम्मेदवारी पाएको ठाउँबाहेक अरु सबै ठाउँमा फिर्ता लिएका हौँ ।’
यसअघि माओबादी केन्द्र इटहरीले आफूहरूको अस्तित्व नै संकटमा परेको भन्दै सबै वडामा उम्मेदवारी उठाएको थियो ।
गठबन्धनसँग वार्ता नभएपछि उम्मेदवारी उठाएको बताउँदै आएको केन्द्रले गठबन्धनलाई सघाउनेगरी उम्मेदवारी फिर्ता लिएको उनले बताए ।
यही बैशाख ३० गते हुने स्थानीय तहको निर्वाचनमा गठबन्धनले इटहरीमा नेपाली कांग्रेसका हेमकर्ण पौडेललाई मेयर र नेकपा एकीकृत समाजवादीका केशवकुमार विष्टलाई उपमेयरमा उठाउने निर्णय गरेको छ ।
यो पनि –‘गठबन्धनको जो उमेद्वार भएपनि जिताउनुपर्छ’ – माओबादी केन्द्र इटहरी नगर इन्चार्ज मदन चुडाल
Discussion about this post