इटहरी : पछिल्लो समय आम युवाहरू राजनीतिभन्दा पर रहेर आफ्नै काममा व्यस्त हुन्छन् ।
कतिपय भने विदेश जाने तथा उतै जीवन व्यतित गर्ने सपना पनि देख्छन् । तर, यी कुरा भन्दा फरक रहेर राजनीतिमा समर्पित रहने उदेश्यले खोटाङको दिप्रुङ्ग–चुईचुम्मा गाउँपालिकाका युवा अरुण राई चुनावी मैदानमा होमिएका छन् ।
उनी अष्ट्रेलिया जाने अन्तिम तयारीमा थिए । काठमाण्डौँ पढ्न बसेका उनी उतैबाट बाहिर जाने तयारी गरिरहेपनि अहिले भने जनताका दुःखसुखमा साथ दिने उदेश्यले राजनीतिमा होमिएका हुन् ।
विद्यार्थी कालदेखि सक्रिय राजनीति गरेका अरुणलाई विदेश जाने सपनाभन्दा पनि आफ्नै गाउँ, लेक बेसीको सम्झनाले तान्न थाल्यो ।
विदेश जाने तयारी गरेका अरुणले सोच बदलेर गाउँ फर्किएका छन् । उनले अहिले दिप्रुङ्ग–चुईचुम्मा गाउँपालिकाकाको वडा नम्बर ७ मा वडाध्यक्षको उम्मेदवारी दिएका छन् । उनी स्थानीय तहको निर्वाचनमा नेकपा माओवादी केन्द्रबाट दिएका हुन् ।
वडामै गुणस्तीय शिक्षा प्रदान गर्ने, स्वास्थ्य केन्द्रबाटै चेकजाँचसहित औषधिको वितरण गर्ने, सीप विकास गर्दै युवालाई स्वरोजगार बनाउँदै विदेश पलायन रोक्ने योजना लिएर उनी अहिले गाउँका घर–घर गएको बताउँदै आएका छन् ।
कृषि र पर्यटनलाई व्यवसायिक रूपमा विकास गर्ने उनको योजना रहेको छ । बढ्दो बसाईँसराईँ र युवाहरूको पलायन रोक्न रोजगारी सृजना गर्ने योजना रहेको उनले बताए ।
कृषि र पर्यटनलाई व्यवसायिक रूपमा विकास गर्दै आयआर्जनको स्रोत बनाउने उदेश्य लिएका राई युवाहरूको प्रतिनिधित्व गर्दै चुनावी मैदानमा होमिएका छन् ।
Discussion about this post