इटहरी : इटहरी उपमहानगरपालिका वडा नं. १ मा गठबन्धनको तर्फबाट नेपाली कांग्रेसका वडाध्यक्षका उम्मेदवार रतन कार्की (कैलाश) ले आफू सबै जनताको मनमा बसेकाले चुनाव जित्ने दाबी गरेका छन् ।
०७४ सालमा भएको स्थानीय तहको निर्वाचनमा इटहरी १ मा वडासदस्यमा निर्वाचित भएका कार्कीले यसअघि कार्यबाहक वडाध्यक्ष समेत चलाइसकेका छन् । अनुभवले निखारिएका कार्कीले यस क्षेत्रमा भएका जनताका समस्या प्रत्यक्ष नियालेको बताउँछन् ।
‘यहाँका जनताले तपाईँ नै वडाध्यक्षमा उठ्नुपर्छ भनेर दबाब दिएकाले मैले पनि चासो देखाएको हुँ, कार्कीले भने, ‘पार्टीले पनि मलाई योग्य सम्झिएर टिकट दियो, म जनताको मनमा बसेको छु, अब चुनाव जितेपछि मुस्कानसहितको सेवा प्रवाह गर्छु ।’
कतिपय उम्मेदवारहरूले भने आफूले चुनाव जितेको अवस्थामा सडक बनाउने, जनताका समस्या समाधान गर्ने, भौतिक विकास गर्ने एजेन्डा उठाउँछन् । तर, यसभन्दा भिन्न रहेर कार्कीले सेवा प्रवाह गर्ने बताउँछन् ।
‘सबैभन्दा पहिला त मुस्कानसहितको सेवा लागू गर्छु, यसो हुँदा जनतालाई पनि स्थानीय सरकार भएको अनुभूत हुन्छ,’ कार्की भन्छन्, ‘यहाँ, बाटोका, स्वास्थ्यका, शिक्षाका समस्या त छन्, तर कार्यालयको सेवा प्रवाहपछि त्यसलाई प्राथमिकतामा राखेको छु ।’
उनले वडाबाट हुने सेवासुविधामा छिटो, चुस्त, दुरुस्त र मुस्कानसहितको सेवा प्रवाहलाई मुख्य प्राथमिकतामा राखेको बताए ।
यहाँ बर्खायाममा डुबानको मुख्य समस्या रहेका कारण त्यसको न्यूनीकरणका लागि पनि अफूले नगर, प्रदेश र संघसम्म समन्वय गरी जनतालाई प्रत्यक्ष अनुभूत हुने किसिमका योजना अगाडि सार्ने बताए ।
उनले भने, ‘यहाँ बाटोको समस्या छ, बाढीको पनि उत्तिकै समस्या छ, यसको न्यूनीकरणका लागि मेरो विशेष पहल हुनेछ, यहाँका जनताको समस्या बुझेको छु ।’ उनले यस क्षेत्रमा शिक्षा, स्वास्थ्यका पनि समस्या रहेका कारण विज्ञहरूसँगको छलफलले यसलाई आकार दिनका लागि महत्वपूर्ण काम गर्ने प्रतिवद्वता जनाए ।
चुनाव जित्ने आधार के–के हुन् भन्ने प्रश्नमा कार्की भन्छन्, ‘म आजभन्दा ६ महिनाअघिदेखि गाउँघरमा सबै जनताको राय लिने काम गरिरहेको छु । उहाँहरूले तपाईँ जुन पार्टीबाट टिकट ल्याएपनि मत हाल्छौँ, हाम्रो मनमा बस्नुभएको छ भन्ने आशीर्वाद दिनुभएकाले चुनाव जित्ने विश्वास गर्छु ।’
उनले यस क्षेत्रका सबै जनताको आफूलाई आशीर्वाद भएका कारण चुनाव जित्ने दाबी गरे । यसअघि पनि नेपाली कांग्रेसले नै चुनाव जितेको यो वडामा हाल गठबन्धनले चुनाव जित्ने उनको विश्वास छ ।
यही बैशाख ३० गते हुने स्थानीय तहको निर्वाचनमा इटहरी १ मा कार्कीको प्यानलबाट खुल्ला महिला सदस्य कुमद चौधरी, दलित महिला सदस्य बिष्णुमाया नेपाली, खुल्ला सदस्य हरिहर चौधरी र गठबन्धनबाट खुल्ला सदस्यमा नेकपा माओवादी केन्द्रका जीवनाथ धमला उम्मेदवार छन् ।
को हुन् कैलाश ?
२०४२ असोज ७ गते जन्मिएका कार्कीले तत्कालीन हाँसपोसा गाविस, हाल इटहरी १ को ‘ग्राउण्ड’ समस्या बुझेका छन् । प्लस टु सम्म अध्यापन गरेका कार्की पेशाले व्यवसायी समेत हुन् ।
यसअघि आफ्ना बुबा पार्टी सभापति भएका कारण पनि राजनीतिप्रति चासो दिएको उनी बताउँछन् । तरुण दलको वडाअध्यक्ष समेत भइसकेका कार्कीले इटहरी २ बाट क्रियाशिल सदस्य लिएर राजनीतिक यात्रा अगाडि बढाएका हुन् ।
यस क्षेत्रकै लोकप्रिय मानिएका कार्की युवा उम्मेदवार भएकाले वडामा विकासको भिजन दिन सक्ने उम्मेदवारका रूपमा चिनिन्छन् ।
Discussion about this post