इटहरी : इटहरीमा उत्पादन भएका कृषकका बालीका तरकारी खेर नजाने भएको छ ।
कोरोना महामारी नियन्त्रण गर्न सुनसरीमा जारी भएको लकडाउनले इटहरीका कृषकहरुको तरकारी बारीमै कुहिन थालेपछि इटहरी उपमहानगरपालिकाले तरकारी खेर जान नदिनका लागि सहजीकरण गर्ने भएको हो ।
उपप्रमुख लक्ष्मी गौतमले कृषिजन्य उत्पादन बजारसम्म पुर्याउन नसक्दा बारीमै तरकारी कुहिन थालेको सूचना आएपछि आफूले अनुगमन गरेर तरकारी खेर जान नदिनका लागि सहजीकरण गरेको बताइन् ।
‘सार्वजनिक यातायात सञ्चालनमा रोक लागेपछि कृषिजन्य उत्पादन बजारसम्म पुर्याउन नसक्दा बारीमा नै कुहिन थालेको सूचना आएपछि सहजीकरणका लागि हामीले पहल थालेका छौँ,’ उनले भनिन्, ‘कृषकहरुले सरकारले वैकल्पिक व्यवस्था वा राहत दिनुपर्ने बताइरहेपछि समस्या समाधान गर्न सहजीकरण गरेको छ ।’
उनले कृषक र थोक बिक्रेताहरुसँग छलफल अघि बढाएको बताइन् । तरकारीका होलसेल ब्यापारीहरुले बारीमै गएर सब्जी उठाउने समेत प्रतिबद्धता जनाएपछि कृषकहरुमा केहीहदसम्म भएपनि राहत महसुस भएको उनको भनाइ छ ।
उनका अनुसार इटहरीका कृषकहरुको बारीमा उत्पादन भएका क्विन्टल भन्दा माथि भए कृषकको बारीमै गएर उठाउने र त्यो भन्दा थोरै भए कृषकले पसलमा ल्याइदिनुपर्ने गरि समन्वय गरिएको उपप्रमुख गौतमले जानकारी दिइन् ।
लकडाउनका कारण उत्पादित तरकारी बजारसम्म पुर्याउन नसक्दा कुहिएर कृषकहरु पीडित बनेका थिए । कृषकको गुनासोपछि उपप्रमुख गौतमले कृषकको बारीमै पुगेर अनुगमन गरेकी थिइन् ।
कृषकहरुले भारतदेखि तरकारी आयात भइरहेको तर आफ्नै ठाँउमा उत्पादित तरकारी कुहिएर गएको गुनासो गरेपछि अनुगमन गरेको उपमहानगरले जनाएको छ ।
Discussion about this post