इटहरी : सुनसरी प्रहरीले जिल्लाका विभिन्न स्थानबाट लागूऔषध ब्राउनसुगर र गाँजासहित पाँच जनालाई पक्राउ गरेको छ । प्रहरीले उनीहरूको साथबाट करिब ५.८ किलो गाँजा र २७ ग्रामभन्दा बढी ब्राउनसुगर बरामद गरेको जनाएको छ ।
इटहरी उपमहानगरपालिका–७ बज्राहा मुसरीटोलबाट प्रहरीले ४६ वर्षीय दिनेश चौधरीलाई पक्राउ गरेको छ ।
लागूऔषध बिक्री–वितरण भइरहेको सूचनाका आधारमा कोशी प्रदेश प्रहरी कार्यालय विराटनगरको पीआईटी, इलाका प्रहरी कार्यालय इटहरी र अस्थायी प्रहरी चौकी पुष्पलाल चोकबाट खटिएको संयुक्त टोलीले चौधरीलाई शंका लागि जाँच गर्दा उनको साथबाट ०.८७ ग्राम ब्राउनसुगर र ३.९४ किलो गाँजा बरामद गरेको हो ।
यस्तै, देवानगञ्ज गाउँपालिका–७ स्थित रमेश यादवको घरअगाडि रहेको मिलघरमा लुकाइराखेको अवस्थामा १.९६ किलो गाँजा बरामद भएको प्रहरीले जनाएको छ ।
उक्त घटनामा प्रहरीले स्थानीय १९ वर्षीय रामबाबु यादव तथा भारत अररिया जिल्ला सोनापुर पञ्चायत–६ का १९ वर्षीय सोनु मेहता र पोसदाहा पञ्चायत–६ का २६ वर्षीय सुमित संगम मेहतालाई नियन्त्रणमा लिएको छ ।
इटहरी–१६ मित्तेरी टोलबाट पनि प्रहरीले इटहरी–१७ का १९ वर्षीय अबु खानलाई ०.१९ ग्राम ब्राउनसुगरसहित पक्राउ गरेको छ । शंकास्पद अवस्थामा जाँच गर्दा उनको साथबाट उक्त पदार्थ फेला परेको प्रहरीले जनाएको छ ।
त्यस्तै, इटहरी–१० डिभिएम बोर्डिङ छेउबाट १७ वर्षीय शिबु मण्डल ०.३९ ग्राम ब्राउनसुगरसहित पक्राउ परेका छन् । लागूऔषध बिक्री–वितरण भइरहेको सूचनाका आधारमा खटिएको प्रहरी टोलीले उनलाई जाँच गर्दा उक्त पदार्थ फेला पारेको हो ।
यसैगरी, बराहक्षेत्र नगरपालिका–११ मधुवन बुधबारेबाट प्रहरीले २५.६३ ग्राम ब्राउनसुगर पदार्थसहित ४० वर्षीय कर्णबहादुर राईलाई पक्राउ गरेको छ ।
लागूऔषध नियन्त्रण ब्यूरो विराटनगर र इलाका प्रहरी कार्यालय महेन्द्रनगरबाट खटिएको संयुक्त टोलीले लौकहीबाट प्रकाशपुरतर्फ आउँदै गरेको प्रदेश ०१–०२–०५१ प ४८०१ नम्बरको मोटरसाइकल जाँच गर्दा राईको साथबाट उक्त पदार्थ बरामद गरेको हो ।
प्रहरीले पक्राउ परेका सबैमाथि सम्बन्धित प्रहरी कार्यालयमा राखी लागूऔषधसम्बन्धी थप अनुसन्धान भइरहेको जनाएको छ ।
Discussion about this post