धरान : संसद विघटन गरेको विरुद्धमा धरानमा चार दलले संयूक्त रुपमा आज विरोध प्रदर्शन गरेका छन् ।
नेपाली कांग्रेस, नेकपा माओवादी केन्द्र, जनता समाजवादी पाटी र संघिय लिम्बूवान परिषद्ले संयुक्त रुपमा संसद् विघटन विरुद्धमा धरानको भानुचोकमा विरोध प्रदर्शन गरेका हुन् ।
धरान ७ स्थित रहेको जनता समाजवादीको पाटी कार्यालयबाट निस्किएको संयूक्त विरोध र्याली भानुचौकमा पुगेर कोणसभामा परिणत भएको थियो । भानुचौकमा राष्ट्रपति विद्यादेवी भण्डारी र प्रधानमन्त्री केपी शर्मा ओलीको पुत्ला समेत जलाएका थिए । विरोधसभामा नेपाली कांग्रेसका सुनसरी जिल्ला सचिव सुजेन्द्र गोले तामाङ र माओवादीका नेता सुदर्शन श्रेष्ठले सम्बोधन गरेका थिए ।
नेपाली कांग्रेस सुनसरीका सचिव तामाङले नेपाली जनताहरु यतिबेला कोभिडको आक्रान्तबाट गुज्रिरहेको अवस्थामा राहत र स्वास्थ्य सेवालाई सुलभ र सशक्त प्रभावकारी ढंगबाट सञ्चालन गर्नुपर्ने बताउँदै मुलुकमा शक्ति र सत्ताको चलखेल सुरुभएको बताए । उनले विदेशी शक्तिहरुको आडमा अहिले मुलुकलाई अन्धकार र षड्यन्त्रको खाल्डोमा पुर्याउने प्रयास भइरहेको बताए ।
राष्ट्रपति र प्रधानमन्त्रीले बेमौसममा संसदलाई भंग गरेर मध्यावधि निर्वाचनतर्फ मुलुकलाई लैजाने प्रयास भइरहेको बताउँदै सचिव तामाङले यो नितान्त असंवैधानिक, अलोकतान्त्रिक र प्रतिगमणकारी कदम भएको बताए ।
सर्वोच्च अदालतले जनता र संविधानको पक्षमा फैसला गर्नुपर्ने उनको भनाई थियो । जबसम्म संसदको पुर्नवाहाली हुँदैन तबसम्म शान्तिपूर्णढंगबाट विरोधका कार्यक्रमहरुलाई निरन्तरता दिने उद्घोष गरे ।
Discussion about this post