धरान : धरान उपमहानगरपालिकाले कृषकहरुलाई कालो बंगुरको पाठापाठी वितरण गरेको छ ।
उपमहानगरपालिकाले २५ जना कृषकहरुलाई प्रति व्यक्ति ४ वटाका दरले १ सय वटा कालो बंगुरको पाठापाठी वितरण गरेको हो ।
धरान १३ स्थित कृषि उपज बजारमा आज एक कार्यक्रमको आयोजना गरि धरान उपमहानगरपालिकाका मेयर तिलक राईले कृषकहरुलाई कालो बंगुरको पाठापाठी वितरण गरेका थिए ।
मेयर राईले कृषकहरुलाई उपयुक्त खोर बनाउन सुझाव दिदँै बंगुरको पाठापाठी लगेर मास्न नहुने बताए । कृषकहरुलाई प्राविधिक ज्ञान र सहयोग रहने पनि उनले बताए । बेला बेलामा कृषि शाखाका प्राविधिकहरुलाई बोलाएर परामर्श लिन उनको आग्रह थियो ।
‘धरान उपमहानगरपालिकाले अनुगमन पनि गर्छ, अनुगमनमा हामीले दिएको बंगुरको पाठापाठी खोरमा भेटिएनौ भने तपाईहरुलाई कारबाही पनि हुन्छ, जरिवाना पनि हुन्छ,’ मेयर राईले भने, ‘किसानहरु सही ढंगबाट हिड्न सक्यो भने स्थानीय सरकार, प्रदेश र केन्द्रिय सरकारले आवश्यक परेको खण्डमा अनुदान दिन सक्छ ।’
मेयर राईले पशुपालनबाट फाईदा लिन सकिने बताउँदै धरान उपमहानगरपालिकाले कालो बंगुरलाई प्रवद्र्धन गर्ने उद्देश्य लिएको बताए ।
धरान उपमहानगरपालिकाका पशु शाखाका अनुसार यस भन्दा अघि २५ जना कृषकहरुलाई एक सय वटा बंगुरको पाठापाठी वितरण गरिएको थियो ।
यस्तै, दोश्रो चरण अन्तर्गत आज धरान वडा नं. ६ चौकीडाँडा बंगुर पालन कृषक समूह, वडा नं. ४ का खैरेनीटार बंगुर पालन कृषक समुहका २५ जना कृषकलाई छनौट गरेर एक सय वटा बंगुरको पाठापाठी वितरण गरिएको जनाएको छ ।
यस्तै, पहिलो चरण अन्तर्गत पत्रङबारी बंगुर पालन कृषक समूहका छुटेका ५ जना कृषकलाई पनि आज बंगुरको पाठापाठी वितरण गरिएको पशु शाखाले जनाएको छ ।
Discussion about this post