धरान : धरान उपमहानगरपालिकाले किसानलाई मिनी ट्रिलर हस्तान्तरण गरेको छ ।
आज (मङ्गलबार) उपमहानगरपालिका परिषरमा मेयर तिलक राईले धरान वडा नं. २० स्थित रहेको कोकाहा बहुउद्देशीय कृषि समूहका किसानलाई दुई थान मिनी ट्रिलर हस्तान्तरण गरेका हुन् ।
किसानलाई मेशिन हस्तान्तरण गर्दै मेयर राईले केन्द्र, प्रदेश सरकार र स्थानीय सरकारले धेरै लागत साझेदारीमा किसानहरुलाई विभिन्न योजनाहरु हस्तान्तरण गरिरहेको बताए ।
‘विष्णुपादुकामा चक्लाबन्दी कार्यक्रम खेतको गराहरु सा–सानो गरा त्यसमा एक हल गोरु पनि नअट्ने, त्यसलाई चक्लाबन्दी गरेर, फाँटिलो बनाएर कम्तिमा मेशिनहरु चलाउन सक्ने, ट्याक्टरहरु चलाउन सक्ने गरि योजनाहरु अगाडि बढिरहेको छ,’ मेयर राईले भने ।
उनले केन्द्र, प्रदेश र उपमहानगरपालिकाको अनुदानको मात्रै भरपर्न नहुने भन्दै किसानले आफै पनि लगानी गर्नुपर्ने बताए ।
कृषि शाखाका अधिकृत नगेन्द्र तामाङले उपमहानगरपालिकामा संघीय सरकारको शसर्त अनुदानको राष्ट्रिय महत्वको बाली प्रधानमन्त्री कृषि आधुनीकिकरण परियोजना पकेट कार्यक्रम अन्तर्गत किसानलाई खेत जोत्ने मेशिन उपलब्ध गराईएको जानकारी दिए ।
उनका अनुसार संघीय सरकारबाट शसर्त अनुदान भनेर २० लाख रुपैँया बजेट आएको छ ।
राष्ट्रिय महत्वको बाली धान पकेट कार्यक्रम सञ्चालनका लागि उक्त बजेट आएको हो । दुई थान खेत जोत्ने मेशिन २ लाख रुपैयाँमा खरिद गरेर कोकाहा बहुउद्देशीय कृषि समूहलाई आज हस्तान्तरण गरिएको उनले बताए । समूहमा १६ जना कृषक रहेका छन् । लाभान्वित घर परिवार संख्या ४० जना छन् ।
विष्णुपादुकाको २० हेक्टर जमीनमा भड्डु धान रोप्ने गरिएको तामाङको भनाइ छ । ‘रैथानेबालीलाई संरक्षण गर्न किसानहरु लगायत उपमहानगरपालिकाको साझेदारीमा सञ्चालन भईरहेको छ,’ उनले भने ।
कृषि समूहका अध्यक्ष मचिन्द्र राईले उपमहानगरपालिकाको कृषि शाखाले धान पकेटको लागि खेत जोत्ने मेशिन मिनि ट्रिलर दिदाँ आफूहरु खुशी भएको बताए ।
‘उपमहानगरपालिकाले यस्ता किसिमका योजना ल्याउँदा धेरै उत्पादन गर्नका लागि हौशला मिल्छ,’ उनले भने, ‘किसानहरुलाई केन्द्र, प्रदेश र स्थानीय सरकारले पहिचान गरेर हरेक क्षेत्रमा सहयोग गर्न आवश्यक छ ।’
Discussion about this post