इटहरी : इटहरीमा खोपको विषयमा विवाद भएको छ । इटहरी उपमहानगरपालिका वडा नं. २ को कार्यालयमा शुक्रबार (हिजो) खोपको विषयमा विवाद भएको हो ।
भेरोसेल खोपको दोस्रो डोज लगाउने कार्यक्रम रहेपनि वृद्ववृद्वा, अशक्त, अपाङ्ग मानिसहरु दुईदिनदेखि लाइन लाग्दा पनि खोप लगाउन पाएका थिएनन् ।
नेपाली कांग्रेस इटहरी २ का सभापति दीपेन्द्र घिमिरेका अनुसार शुक्रबार खोप कार्यक्रम चलिरहेको थियो, जेष्ठ नागरिक, अपाङ्ग, अशक्तहरु बिहीबारदेखि नै लाइन लागेका थिए । तर, शुक्रबार मध्यान्हसम्म पालो नआएपछि लाइनमा बसेका मानिसहरु आक्रोशित भएर वडाध्यक्षविरुद्व नाराबाजी गरिएपछि कांग्रेसका २ नं. वडाका कार्यालय सचिव निराजन पाण्डेमाथि अपहरण शैलीमा कार्यकक्षमा थुनिएको छ ।
‘पानी वितरण गर्नका लागि स्वंयम्सेवकका रुपमा खटिएका हाम्रा कार्यालय सचिवमाथि कार्यकक्षमा थुनिएको छ, अहिले आफूमाथि हातपात भएको भनेर उनीहरुले नै प्रहरीमा उजुरी गरेका रहेछन्,’ घिमिरेले भने, ‘लोचन पौडेलको ठाडो निर्देशनमा दुईजना प्रहरीहरुले धम्कीसहित अपहरण शैलीमा वडा कार्यालयभित्र लगेर मानसिक टचर समेत दिएछन्, उनीहरुका कार्यकर्तालाई लाइन नै नलागेर पनि खोप लगाएको अवस्थामा अशक्तहरुमाथि राजनीति भयो ।’
खोप लगाउने क्रममा नाराबाजी भएपछि पाण्डेले भिडियो खिच्ने क्रममा, किन खिचेको, डिलिट गर् भन्दै प्रहरीहरुले धम्की समेत दिएको घिमिरेको आरोप छ । एमाले २ नं. वडाका अध्यक्ष लोचन पौडेलकै निर्देशनमा प्रहरीहरुले पक्राउ गर्नु र बन्दी सो सरह कार्यकक्षमा थुनिनु आपत्तिको विषय रहेको घिमिरेले बताए । ठूलो स्वरमा बोलेको भन्दै इलाका प्रहरी कार्यालयमा उनीहरुले उजुरी गरेकाले आफूहरु अहिले छलफलमै रहेको उनले बताए ।
यता, वडाध्यक्ष हर्क मगरले भने आफ्नो बचाउ गरे । ‘अब गुण्डाको राज चल्दैन, कार्यालयभित्र छिरेर हातपात भयो,’ फोन सम्पर्कमा टाकुरासँग वडाध्यक्ष मगरले भने, ‘आफैँ वडाध्यक्ष मुर्दावाद भन्न लगाएर नाराजुलुस गर्ने र भिडियो रेकर्ड गर्ने, हामीले खोप लगाउने हो ?, हामीले त ठाउँ मात्रै व्यवस्थित गरिदिएको हो ।’
लोचन पौडेल कर्मचारी हो भनेर सोधिएको प्रश्नमा उनले भने, ‘होइन । एमाले २ नंं. वडा कमिटिको पार्टी अध्यक्ष हो, उहाँमाथि कार्यकक्षमै हातपात भएको छ ।’
उता, इलाका प्रहरी कार्यालय इटहरीमा अहिले कांग्रेस कार्यकर्ताहरु छलफलका लागि भनेर भेला भएपनि एक पक्षमात्रै सहभागी भएकाले छलफलको प्रक्रिया अघि बढेको छैन ।
Discussion about this post