इटहरी : बैशाख ३० गते हुने स्थानीय तहको निर्वाचनलाई लक्षित गर्दै प्रदेश १ मा २८ हजार सुरक्षाकर्मी परिचालन गरिएको छ ।
प्रदेश १ प्रहरी कार्यालय विराटनगरका प्रवक्त (एसपी) नवीनराज राईका अनुसार प्रदेश १ का १४ वटै जिल्लामा १० हजार ५९१ प्रहरी र १७ हजार ४ सय २८ म्यादी प्रहरी परिचालन गरिएको हो ।
निर्वाचनलाई लक्षित गरि मंगलबार राति १२ बजेदेखि वैशाख ३० गते राति १२ बजेसम्म नेपाल भारत सीमा बन्द रहने जनाइएको छ । स्थानीय तहको निर्वाचनलाई मध्यनजर गरी निर्वाचनलाई स्वच्छ, निष्पक्ष र भयरहित वतावरणमा सम्पन्न गर्न विशेषगरी सुनसरी, मोरङ, झापाका सीमा नाकामा कडाइ गरिएको एसपी राईले जानकारी दिए ।
सुनसरीका प्रमुख जिल्ला अधिकारी ईन्द्रदेव यादवका अनुसार निर्वाचनलाई लक्षित गरेर मादक पदार्थ बिक्रीवितरण तथा सेवनमा पनि रोक लगाइएको छ ।
उनका अनुसार सुनसरी प्रशासनले एक सूचना जारी गर्दै मौन अवधि सुरु भएपछि निर्वाचनको मतपरिणाम नआउन्जेल सम्मका लागि मादक पदार्थ बिक्री वितरण तथा सेवनमा रोक लगाइएको हो ।
प्रदेशभर ३२१ मतदान स्थल अति संवेदनशील
प्रदेश १ मा ३ सय २१ मतदान स्थल ‘अति संवेदनशील’ रहेको बताइएको छ ।
‘साबिकका निर्वाचनमा त्यहाँ भएका घटनाहरू र भूगोलको आधारमा हामीले पूर्वानुमान गरेर वर्गीकरण गरेका हौँ,’ सुनसरीका प्रजिअ यादव भन्छन्, ‘सबैभन्दा सामान्य राखिएको निर्वाचन स्थल पनि अति संवेदनशील हुनसक्छ, निर्वाचन भनेको ठ्याक्कै पूर्वानुमान गर्न सकिने घटना होइन ।’
सुनसरीमा दुईवटा उपमहानगरपालिका, चार नगरपालिका र ६ गाउँपालिका गरी १२ वटा स्थानीय तह छन् । जसमा १२४ वटा वडामा सो संख्यामा मतदानस्थल रहेको प्रजिअ यादवको भनाइ छ ।
‘एक हजार मतदाता बराबर एउटा मतदान केन्द्र रहेको छ, हामीले एउटा मतदान केन्द्रमा पाँचजना कर्मचारी खटिनेगरी काम गरिरहेका छौँ,’ उनले भने, ‘जसमध्ये चार हजार ९५ जना सुरक्षाकर्मी परिचालन भएका छन् ।’
उनका अनुसार सुनसरीमा १,१६६ जना नेपाल प्रहरी, ५१२ जना सशस्त्र प्रहरी बल, ३३० जना नेपाली सेना, १९ जना राष्ट्रिय अनुसन्धान समूह र २०६८ जना म्यादी प्रहरी गरी उक्त संख्यामा सुरक्षाकर्मी परिचालन भएका छन् ।
जिल्ला निर्वाचन कार्यालय सुनसरीका प्रमुख, कृष्णप्रसाद पौडेलले निर्वाचनलाई स्वच्छ बनाउने बताए । ‘निर्वाचनलाई निष्पक्ष, भयरहित बनाउनका लागि आचारसहिंता बनाइएको हो, यो सबैका लागि लागू हुन्छ,’ उनले भने, ‘समाजमा सबै जातिका भाषा, धर्म, संस्कृतिको संरक्षण गर्ने नभइ त्यस विरुद्वका क्रियाकलाप गर्ने, असर पार्ने किसिमका क्रियाकलाम नगर्न पनि सूचित गरिएको छ ।’
जिल्ला सुरक्षा समितिको सिफारिसको आधारमा निर्वाचन आयोगले मतदान स्थललाई ३ तहमा वर्गीकरण गरेको छ ।
सो वर्गीकरण अनुसार प्रदेशका १४ जिल्ला रहेको प्रदेशमा ४ हजार ५१ वटा मतदान केन्द्र र १ हजार ८ सय ७७ मतदान स्थल मध्ये ३ सय २१ मतदान केन्द्र अति संवेदनशील वर्गीकरण गरिएको १ नं. प्रदेश प्रहरी कार्यालय विराटनगरका प्रवक्ता एसपी राईले जानकारी दिए ।
उनका अनुसार प्रदेशमा ८ सय ४९ वटा संवेदनशील र ७ सय ७ वटा सामान्य रहेको बताए ।
Discussion about this post