इटहरी : निरन्तरको वर्षाले इटहरीका विभिन्न ठाउँका बस्तीमै बाढी पसेको छ । इटहरीको बूढीखोला, टेङ्ग्रा खोलामा पनि पानीको सतह बढेको छ ।
इटहरी २० का वडाध्यक्ष मणिराम श्रेष्ठका अनुसार तरहराको जनसहयोग स्कुल लाइनमा बाढी पसेको छ । ‘सामान्य वर्षातमै यो ठाउँमा सधैँ बाढी पस्थ्यो,’ श्रेष्ठले भने, ‘आज त निरन्तर पानी पसेका कारण बाढी वस्तीमै पसेको छ ।’
उनका अनुसार पानीपियाबाट आउने खोला र तामाङ टोलपट्टीबाट चौतारी चौक हुँदै आउने खोलाका कारण पनि यो क्षेत्रमा बाढी पसेको हो ।
यस्तै, इटहरीको बूढीखोलामा पानीको सतह बढेको इटहरी ३ का वडाध्यक्ष उमेश सुवेदीले जानकारी दिए । उनले टाकुरासँग भने, ‘निरन्तर पानी परेपछि बाढी त आइहाल्छ, तर अहिलेसम्म कतैपनि कटान भएको छैन ।’
उनका अनुसार इटहरी ३ को खोर्सानेखाप, सुनौलो बस्ती, इटहरी ४ को गैरीगाउँ लगायतका बस्तीमा पनि असर नगरेको भएपनि डुबान भने भएको छ । उनले भने, ‘बाढीले असर गरेको खबर अहिलेसम्म छैन, तर ड्रेनले गर्दा केहीकेही ठाउँमा डुबान भएको छ ।’
इटहरी ८ मा भने विराटनगर लाइनमा सडकमै बाढी पस्दा साना सवारीसाधन आवतजावत ठप्प छन् । स्थानीय मनोज चौधरीका अनुसार विराटनगरको साथी पेट्रोलपम्प भन्दा उत्तरबाटै सडकमा बाढी पसेका कारण साना सवारी साधन ठप्प भएका हुन् ।
‘साथी पेट्रोल पम्पको उत्तरबाट छिरेको बाढी कर कार्यालयभन्दा दक्षिणसम्म उस्तै छ,’ उनले टाकुरासँग भने, ‘सडकमै एक फिट, डेढ फिट र दुई फिटसम्म पानी जमेको छ, मोटरसाइकल, साइकल र सफारीको आवतजावत ठप्प छ ।’ उनका अनुसार ठूला सवारी साधन भने चलिरहेका छन् ।
यता, पानीपियामै विद्युतमा समस्या भएका कारण धरान क्षेत्रमा विद्युत अवरुद्व भएको धरानका मेयर हर्क साम्पाङले जानकारी दिए । उनले सामाजिक सञ्जालमा लेखेका छन्, ‘तरहरा मास्तिर पानीपियामा विद्युत लाइनमा समस्या देखिएकाले मर्मत हुँदै गरेकाले लाइन नआएको जानकारी प्राप्त भएको छ ।’
इटहरीमा विशेषगरी वर्षेनी टेङ्ग्रा खोला, बूढीखोला, खेती खोलाले इटहरीका वडा नं. ३, ४, ६, ९, १०, ११ वडा बाढीबाट प्रत्यक्ष प्रभावित बन्दै आएका छन् ।
यता, इटहरी २० र २ मा पर्ने तरहराको कृषि फारम, तरहराका अन्य केही ठाउँहरु, इटहरी ७ को बज्राहामा पनि पानीका कारण केही घरहरु डुबानमा परेका छन् ।
उता मौसम पूर्वानुमान महाशाखाका अनुसार सुनसरी, मोरङ र झापाका अधिकांश स्थानहरूमा निरन्तर परेको वर्षातका कारण सर्तकता अपनाउन अपिल गरिएको छ । मेची, विरिङ, वक्राहा, लोहन्द्रा, बूढीखोला, सुनसरी खोला लगायत साना नदीहरूमा बाढीको जोखिम भएकाले सर्तकता अपनाउन अपिल गरिएको हो ।
Discussion about this post