मिक्लाजुङमा कविताको वर्षा

मेरो माया मफलर भए

बाँधिहिड्थेँ गलामा !

कैलेकाहीँ त मन नहुँदा

टाँगिहिड्थेँ किलामा ! 

करिब ६५ वर्षअघि, अयामेली कवि बैरागी काइँलाले सिर्जना गरेको ‘माया र मफलर’ शीर्षकको कविता वाचन भइरहँदा, खचाखच भरिएको हलले अनौठो मानेर सुनिरहेका थिए ।

कविता नलेख्ने मात्रै होइन, कहिल्यै वाचनसमेत नगरेका मिक्लाजुङ गाउँपालिका प्रमुख बविकुमार राई, त्यो अनौठोका कारण बनेका थिए । पोडियमको माइकअघि उभिएर अध्यक्ष राईले मोबाइलको स्क्रिन चलाएजस्तो गरे । केही असजिलो देखिएका उनले भरिभराउ हलतिर आँखा डुलाउँदै मुस्कुराए ।

र, काइँलाको चार हरफे कविता कण्ठस्त वाचन गरिदिए । हल तालीले गुञ्जयमान् बन्यो । उक्त कविता वाचनसँगै कार्यक्रम सञ्चालकले ‘मिक्लाजुङ काव्य उत्सव– २०८३’ को विधिवत उद्घाटन भएको जनाउ दिए ।

मिक्लाजुङ साहित्य समाज मोरङको आयोजनामा सम्पन्न काव्य उत्सवमा कोशी प्रदेश र प्रदेश बाहिरका करिव पाँच दर्जन कविहरूले आ–आफ्ना कविता सुनाएका थिए । निरन्तर तीन घन्टासम्म चलेको काव्यीक दौडको सुरुवात विराटनगरका कवि सीमा अभासले ‘चक्रवर्ती महाराजप्रति’ शीर्षकबाट गरेकी थिइन् ।

पर्यटनसँगै साहित्य सन्देशका साथ सम्पन्न भएको काव्यिक उत्सवमा चर्चित कविहरू भूपिन, निमेश निखिल, विना थिङ, मुनाराज शेर्मा, सुन्दर कुरुप, शुभलक्ष्मी लम्साल, सुमीत्र वाङ्देल चेली, प्रकाश बुढाथोकी, देवान किराती, सुदीप पाख्रिन, सविता फागो, नरेश काङ्माङ राई, चन्द्र गुरुङ, विनेश राई मिन्जाई, अमित थेबे, पराजित पोमु, टोलीप्रसाद राजवंशी, प्रकाश दिप्साली, विवश बलिभद्र, भूपेन्द्र तिमल्सिना, कृष्ण काश्यप, राज भट्टराई, अभागी थेगुवा, सेलीङ केसी, रुमानी कुलुङ, जेबी निखुन्त, अनिष राई, विराट किराती, केपी घिमिरे, युवराज ठकुरी, यज्ञ परिश्रमी, युगयोगी राई, दिलिप सगर, शकुन्तला मञ्जर, साङ्सेन पन्धाक, अबीलाल राई, प्रवेग हाङ्स्रोङ, दीपा मग्राती, किरण शिवालगायतको प्रस्तुति थियो ।

लगातार तीन घन्टाको काव्य श्रवणपछि चितवनबाट मिक्लाजुङको काव्यमेला भर्न आइपुगेका कवि भूपिनले भने, ‘भव्य ! यतिका धेरै कविहरू एकैठाउँ समेट्नु आयोजकका लागि जोखिम थियो । तर आज मेरो शङ्काले फेल खायो । अलिकति पनि बोरिङ भएन ।’

पर्यटकीय क्षेत्रको रूपमा विस्तार भइरहेको मोरङको मिक्लाजुङ– १, रमितेखोला स्थित ‘न्यू रमिते स्काई भ्यू’ होटलमा भएको काव्य उत्सवमा बोल्दै मिक्लाजुङ गाउँपालिका प्रवक्ता पर्वत राईले भने, ‘साहित्यमा भूगोल, समाज, संस्कृति, स्वभाविक रूपमा आउने भएकाले आगामी दिनमा तपाइँहरूका सिर्जनामासमेत रमितेखोलाको सुवास मिसियोस् । जसले भर्खरै राइज हुँदै गरेको यस पर्यटकीय क्षेत्रको प्रचारप्रसारमा टेवा पुगोस् ।’

कवि गगन योक्पाङ्देनले सहजीकरण गरेको कार्यक्रममा कविहरूलाई सुनिसकेपछि, प्रमुख अतिथिको मन्तव्य राख्दै गाउँपालिका अध्यक्ष राईले भने, ‘आज अचम्मै भयो । साहित्यको पनि यति भव्य कार्यक्रम हुनेरहेछ ।’

उनले कविहरूले वाचन गरेको कविताको प्रशंशा मात्रै गरेनन् । विगतमासमेत साहित्यिक कार्यक्रमहरूमा पुग्ने गरेको बताउँदै उनले थपे, ‘एकैपटक यतिका धेरै कविहरूलाई आफ्नै क्षेत्रमा सुन्न पाउनुलाई मैले अवसरको रूपमा लिएको छु ।’

कविताको भावमा प्रवेश गरेर कविताहरूको व्याख्यासमेत गर्न भ्याए । उनी यतिमै अडिएनन् । आगामी वर्षमा पालिकाले विशेष बजेटको व्यवस्था गरेर साहित्य तथा पर्यटन महोत्सव गर्ने प्रतिबद्धता नै जनाए ।

मिक्लाजुङ गाउँपलिका मोरङ र अन्य शुभेच्छुकहरूको आर्थीक सहयोगमा भएको काव्य उत्सवका सभापति मिक्लाजुङ साहित्य समाजका अध्यक्ष इन्द्र घिमिरेले उत्सवलाई टुङ्ग्याउँदै भने, ‘हाम्रो मिक्लाजुङलाई एकपटक जुरुक्क उठाइदिनु भयो । तपाइँहरू सबैलाई धन्यवाद ।’