इटहरी : सुनसरी ४ मा मतगणना स्थगित भएको छ । निर्वाचन आयोगले ६०६ मत एमालेतर्फ जोडेपछि नेपाली कांग्रेसले सर्वदलीय बैठकका लागि आग्रह गरेको थियो ।
प्रतिष्पर्धी दल नेकपा एमाले र नेपाली कांग्रेसका उम्मेदवारबीच मतगणना सम्बन्धमा विवाद उत्पन्न भएपछि शनिबार दिउँसो सो क्षेत्रको मतगणना रोकिएको थियो।
सत्तागठबन्धनतर्फका उम्मेदवार रहेका कांग्रेस नेता ज्ञानेन्द्र कार्कीले एमाले पक्षले मतगणनामा धाँधली गरेको आरोप लगउँदै तत्काल मतगणना रोकेर सर्वदलीय बैठक बसेर प्राप्त निर्णयपछि मात्र मतगणना सुरु गर्न माग राखेका छन् ।
एमाले पक्षले ६०६ वटा मतपत्र हिनामिना गर्न खोजेको कांग्रेस पक्षले आरोप लगाएको छ ।
मतगणनाका क्रममा विवाद हुँदा कांग्रेस र एमाले कार्यकर्ताबीच शनिबार अपराह्यन हात हालाहालको स्थिति उत्पन्न भएपछि सुरक्षा निकायले बल प्रयोग गरेको छ ।
मतगणनाका विषयमा विवाद साम्य नभएपछि आइतबार बिहानसम्मका लागि गणनाकार्य स्थगित भएको बताइएको छ । बैठकका क्रममा कांग्रेस कार्यकर्ताले पुनः मतगणना गर्न माग गरेका थिए । अन्यथा, मुख्य निर्वाचन अधिकृत अर्जुन अधिकारीले चित्तबुझ्दो जवाफ दिनुपर्ने अडान राखेका थिए ।
यसैबीच एमाले सुनसरीका अध्यक्ष रेवतीरमण भण्डारीले कानुनका कुरा गरेर निर्णय लाद्न खोजेपछि विवाद उत्पन्न भएको हो ।
यस क्षेत्रमा एमालेका जगदीश कुसियत र कांग्रेसका कार्कीबीच तीव्र प्रतिष्पर्धा देखिएको छ ।
हाल यो क्षेत्रमा ६० हजार बढी मतगणना भएको छ। जसमध्ये एमालेका कुसियतले २३ हजार ३ सय ४१ मत प्राप्त गरेका छन् भने कांग्रेसका कार्कले २३ हजार ४ सय ३९ मत पाएका छन् ।
जसअनुसार कांग्रेसले ९८ मतले अग्रता गरेको छ । यस क्षेत्रमा जम्मा ८१ हजार २ सय ३३ मत खसेको छ ।
Discussion about this post