इटहरी : सुनसरी क्षेत्र नं. ४ मा रोकिएको मतगणना सूचारु गर्न राष्ट्रिय स्वतन्त्र पार्टी (रास्वपा)ले माग गरेको छ ।
शनिबार दिउँसोदेखि रोकिएको मतगणना पुनः सूचारु गर्न रास्वपाले माग गरेको हो ।
रास्वपाबाट सुनसरी ४ मा प्रतिनिधिसभा सदस्यका उम्मेदवार रहेका जीवनकुमार श्रेष्ठले विवादको विषयमा आँफूलाई थाहा नभएको र सर्वदलीय बैठकमा पनि जानकारी नगराइएको बताए ।
‘भित्र केके भयो थाहा भएन, म पनि उम्मेदवार भएका कारण सर्वदलीय बैठकमा खबर हुनुपर्ने हो, जानकारी पनि गराइएन,’ उनले भने, ‘दुईदुईपटक उहाँहरू छलफलमा बस्दा पनि टुंगोमा नपुगेपछि मैले तत्कालै निष्कर्षमा पुग्नका लागि निवेदन दिएको हुँ ।’
उनले आँफूहरू दुई ठूला दल नेपाली कांग्रेस र नेकपा एमालेको लडाईँको बीचमा परेको बताए ।
‘दुई ठूला दलको लडाईँको बीचमा परियो, निष्कर्ष निकाल्न सकिएन भने निर्वाचन नै गर्नुपर्ने हो कि,’ उनले टाकुरासँग भने, ‘नत्र पुनः मतगणना गर्नुपर्ने हो कि, वा गनिसकेको मतबाटै अगाडि सूचारु गर्नुपर्ने हो, निष्कर्षमा पुग्नुपर्यो । अल्झाएर राख्नु भएन, निष्कर्षमा नपुग्दा बिचल्ली भयो ।’
आँफूले सुरुदेखि नै पुनः सुरुदेखि मतगणना हुनुपर्ने उदेश्य नराखेपनि छिटो मतगणना हुुनपर्ने माग राखेको उनको प्रतिक्रिया छ ।
यो क्षेत्रमा मतगणनाको निर्वाचन परिणाममा एमाले उम्मेदवार जगदीशप्रसाद कुसियतको मतमा ६०६ मत बढी थपिएपछि विवाद भएको थियो ।
कांग्रेसबाट उम्मेदवार बनेका सञ्चारमन्त्री समेत रहेका ज्ञानेन्द्रबहादुर कार्कीले पुनः मतगणनाको माग राखेका छन् । कांग्रेसको मागमा एमालेले भने असहमति प्रकट गरेको छ ।
थपिएको ६०६ मत घटाएर मत गणना सुचारू गर्नुपर्ने एमालेको अडान छ । हाल यो क्षेत्रमा ६० हजार बढी मतगणना भएको छ । जसमध्ये एमालेका कुसियतले २३ हजार ३ सय ४१ मत प्राप्त गरेका छन् भने कांग्रेसका कार्कले २३ हजार ४ सय ३९ मत पाएका छन् ।
जसअनुसार कांग्रेसले ९८ मतले अग्रता गरेको छ । यस क्षेत्रमा जम्मा ८१ हजार २ सय ३३ मत खसेको छ ।
Discussion about this post