इटहरी : नेपाल सरकारका खेलकुदमन्त्री डिगबहादुर लिम्बूले अहिले देखिएको भुटानी शरणार्थी प्रकरणमा सबै कुरा बाहिर आउनुपर्ने र अनुसन्धान अझै जरासम्म जानुपर्ने बताएका छन् ।
इटहरीस्थित नेपाली कांग्रेसका नेता विकास केसीको निवासमा शनिबार भएको कार्यकर्ता भेटघाटमा बोल्दै मन्त्री लिम्बूले वर्तमान अवस्थामा देखिएको भुटानी शरणार्थी प्रकरणमा दोषी देखिएका जो कोही भएपनि कारबाहीको दायरामा आउनुपर्ने र अनुसन्धान जरासम्मै पुग्नुपर्ने बताएका हुन् ।
नेपाली कांग्रेस मोरङका सभापति समेत रहेका उनी मोरङ क्षेत्र नं. १ बाट निर्वाचित सांसद हुन् ।
मन्त्री भएपछि आफ्नो गृहजिल्ला मोरङ आएका उनले सुनसरीको इटहरीमा कार्यकर्ता भेटघाटका क्रममा अहिले देशमा भ्रष्टाचारको कुरा उठिरहँदा सबै कार्यकर्ताले अनुसन्धान प्रभावित नर्पान र अनुसन्धानमा सहयोग गर्नुपर्ने बताए ।
‘यो प्रकरणमा मेरो पार्टीको पर्यो, हाम्रो मान्छे पर्यो भन्ने हेर्नुहुँदैन,’ पत्रकारहरुको प्रश्नमा उनले भने, ‘अनुसन्धानमा हामीले सहयोग गर्नुपर्छ । सबै कुरा बाहिर आउनुपर्छ, अनुसन्धान अझै जरासम्म जानुपर्छ ।’
सरकारले अनुसन्धानको पाटोमा काम गरिरहेको र थप अनुसन्धान हुने उनको भनाइ छ ।
‘कसुर प्रमाणित भयो भने कानुनको दायरमा जो कोही पनि आउनुपर्छ ।’ उनले भने ।
उनले एक फरक प्रसंगमा आँफू भर्खरै खेलकुद मन्त्री भएको र युवाहरुलाई खेलकुद क्षेत्रमा प्रोत्साहित गर्नका निम्ति काम गर्ने बताए ।
‘हामीले खेलकुद क्षेत्रको विकास गर्नुपर्ने आवश्यकता छ,’ उनले भने, ‘रोजगारीको सृजनासँगै युवाहरुलाई खेलकुद क्षेत्रमा स्थापित गर्नका निम्ति मेरो भूमिका रहन्छ ।’
उनले वर्तमान अवस्थामा राजनीति प्रति देखिएको चरम असन्तुष्टिले कार्यकर्तासँगै नेतृत्व सच्चिनुपर्ने समेत बताए ।
‘युवा साथीहरुले संगठन सुदृढीकरणका निम्ति काम गर्नुपर्ने देखिन्छ, अब पार्टीमा शेरबहादुर गुट र शेखर गुट भनेर हुँदैन,’ उनले भने, ‘जुनै गुट भएपनि काम गर्ने साथीहरुले अवसर पाउनुपर्छ भन्ने कुरा हो र सँगै नेतृत्वलाई सच्याउनका निम्ति वडा तहबाटै दबाब सृजना गर्नुपर्छ ।’
कार्यक्रममा बोल्दै कांग्रेस इटहरीका युवा नेता विकास केसीले सुनसरी र मोरङमा रहेका खेलकुद संघ संस्था र खेलाडीहरुको विकासका निम्ति काम गर्नका निम्ति माग गरे ।
नेविसंघका पूर्व केन्द्रीय उपाध्यक्ष समेत रहेका केसीले भने, ‘खेलकुद बुझेको मान्छे खेलमन्त्री हुँदा हामी खुशी छौँ, अब युवाहरुले चाहेको खेल क्षेत्रको विकास गर्नका निम्ति हामी सबैको एकै स्वर रहेको छ ।’
कार्यकर्ता भेटघाट कार्यक्रममा सुनसरी क्षेत्र नं. २ का निवर्तमान सभापति मणिराम श्रेष्ठ, सुनसरी २ (क) का सभापति सुबेक्छु देवान राई, इटहरीका कार्यबाहक सभापति बालकृष्ण विष्ट, राजा क्लबका अध्यक्ष सन्तबहादुर डुम्जन, प्रेस युनियन सुनसरी सभापति पवन अधिकारी, नेविसंघ सुनसरी सभापति प्रमोद भट्टराई लगायतको उपस्थिति रहेको थियो ।
Discussion about this post