इटहरी : अविरल वर्षाको कारण बाढीपहिरोमा बेपत्ता भएकाहरूको खोजी कार्यको लागि तालिम प्राप्त कुकुरसहितको प्रहरी टोली परिचालन गरिएको छ ।
असार २ गते राति आएको बाढीपहिरोमा परी बेपत्ता भएका संखुवासभाका २१ जना मानिसहरूको उद्दार तथा खोज तलास कार्यमा खटिएका सुरक्षाकर्मीहरूद्वारा उनीहरूको अवस्था हालसम्म फेला पार्न नसकेकोले तालिम प्राप्त कुकुरसहितको प्रहरी टोली परिचालन गरी खोजी कार्यलाई तीव्रता दिइएको हो ।
जिल्ला प्रशासन कार्यालय संखुवासभाका प्रमुख जिल्ला अधिकारी शिव कुमार कार्की, नेपाली सेना, नेपाल प्रहरी, सशस्त्र प्रहरी र नेपाल प्रहरीको २ वटा तालिम प्राप्त कुकुरसहितको टोलीले बेपत्ता भएका मानिसहरूको खोजतलास गरिरहेको कोसी प्रदेश प्रहरी कार्यालय विराटनगरले जनाएको छ ।
जिल्लाको चैनपुर नगरपालिका ४ स्थित हेवा खोलामा आएको बाढी पहिरोले १७ जना, चैनपुर नगरपालिका १ स्थित पिलुवा खोलामा १ जना, पाँचखपन नगरपालिका ९ स्थित अपरहेवा खोलामा १ जना र सभापोखरी गाउँपालिका ३ स्थितमा पहिरोले पुरेर २ जना बेपत्ता भएका छन् ।
Discussion about this post