इटहरी : इटहरीको एक बोर्डिङको होस्टलभित्र एक बालकको रहस्यमय मृत्यु भएको छ ।
इटहरी ४ स्थित सेकेण्डरी बोर्डिङ स्कूलको होस्टलभित्र सोही विद्यालयमा अध्ययनरत १४ वर्षीय जेनीश श्रेष्ठको मृत्युभएको हो ।
उनको सोमबार मृत्यु भएको इलाका प्रहरी कार्यालय इटहरीका प्रहरी निरीक्षक भीमबहादुर खड्काले जानकारी दिए ।
‘बेलुका नर्मलै सुतेपनि बिहानीपख मृत्यु भएको प्रारम्भिक अनुसन्धानबाट खुलेको छ,’ खड्काले टाकुरासँग भने, ‘हामीले सीसी क्यामेरा हेर्दा नर्मलै सुतेको देखिन्छ, शरीरमा चोटपटक पनि छैन ।’
प्रारम्भिक अनुसन्धानबाट नर्मलै देखिएपनि पोस्टमार्टम रिपोर्ट आएपछि थप अनुसन्धान अगाडि बढाइने उनले बताए । ‘हामीले अहिलेपनि अनुसन्धान गरिरहेका छौँ, पोस्टमार्टको रिपोर्ट आएपछि अनुसन्धान गर्न थप सहज हुन्छ,’ उनले भने ।
बेलबारी २, मोरङ घर भएका मृतक श्रेष्ठ कक्षा ८ मा अध्ययनरत थिए । उक्त विद्यालयमा होस्टलमा राखिएपनि घटना रहस्यमय भएको स्थानीयले बताएका छन् ।
स्थानीयबासीका अनुसार उक्त विद्यालयको होस्टल फोहोर रहेकाले पनि बालकको घटना रहस्यमय भएको बताइन्छ ।
इटहरी ४ का सुनील कार्कीले विद्यालयले अभिभावकलाई होस्टल कक्षा पनि हेर्न नदिने र शिक्षा क्षेत्रमा लापरबाही गरेको आरोप लगाए ।
‘अभिभावक लगायत कसैलाई रुम हेर्न समेत नदिने दादागिरी शैलीमा स्कूल सञ्चालकले होस्टल सञ्चालन गरेको पाइएको छ,’ कार्कीले भने, ‘नाम चलेको पुरानो भनिएको स्कूलको यस्तो अवस्था छ, अन्यको के होला ?’
उता, इटहरी उपमहानगरपालिकाको शिक्षा शाखाले अनुगमन गरेर प्रत्येक स्कूलको अवस्था सार्वजनिक गरेको जनाएपनि अनुगमन फितलो भएको स्थानीयको गुनासो छ ।
Discussion about this post