मोरङ (मिक्लाजुङ) : शनिबार मोरङको मिक्लाजुङ र इलामको चुलाचुली गाउँपालिकाको सीमा स्तम्भ कुइनेटारमा अरूदिनभन्दा फरक माहोल थियो ।
लगातारको झरी, हावाहुरीले कुइनेटार क्रुद्ध भएको थियो । तर, झरी हावाहुरीको कुनै प्रवाह नगरी सुनसरी, मोरङ, झापा, इलामका स्रष्टाहरू कुइनेटारमा आउन थालिसकेका थिए ।
बिस्तारै कुइनेटारको आकाश पनि खुल्दै गयो । पूर्वभरिबाट जम्मा भएका लेखक कविहरू कुइनेटारका खुला आँगनमा निस्किए । खास यहाँ लेखक कविहरूआउने सन्दर्भ भने कवि तथा गीतकार दीपा राई (पुन)को नवीनतम कृति ‘दियोको अन्तिम लप्का र शरदका पहेँला पातहरू’ कविता उत्सव मनाउनु थियो ।
कुइनेटारमा कवि पुनको कविता उत्सव हुँदै गर्दा स्वयम् कवि भने संयुक्त राज्य अमेरिकाको बोस्टनमा निन्द्रासँग मस्त थियो । कविको अनुपस्थितिमै उनका तीन दर्जन बेसी पूर्वका कविहरूले वाचन गरेर उत्सव मनाइरहेका थिए ।
कवि सभ्यता निरौलाले ‘फूल र म’ शीर्षकको कविता वाचन गरेर सुरु भएको कार्यक्रममा मोरङ रङ्गेलीका कवि रमेशचन्द्र अधिकारीले ‘परदेशी पीर’ शीर्षकको कविता वाचन गरे । इलामका कवि सुन्दर कुरुपले ‘जीवन अनुभूति’, विवश बलिभद्र कोइरालाले ‘हार छैन स्वीकार’ शीर्षकको कविता वाचन गरे ।
यस्तै, विराट किराती, अभागी थेगुवा, राजकुमार अनिश्चि, साङसेन पन्धाक, सुमन राई, मुना आत्रेय, यज्ञ परिश्रमी, कृष्ण उदाशी, निहाङ किराती, टीका राष्टप्रेमी, राजेन्द्र विवश, सकुन्तला मन्जरी, दीपक दियालो, साइप्रिया बराललगायत ३ दर्जन कविहरूले डेढघन्टा सम्म लगातार कविता उत्सव मनाइरहे ।
‘दियोको अन्तिम लप्का र शरद्का पहेँला पातहरू’ उत्सवमा कार्यक्रमका विशेष व्यक्तित्व कवि मनु मञ्जिलले दीपा राई पुनको कविता पढ्दा मेडिटेसनको एउटा चरणमा प्रवेश गरिने बताए ।
कविताबारे धारणा राख्दै उनले भने, ‘प्रकृति सँग रम्ने कवि दीपाका कविताहरू स्वयम् प्रकृति जस्तै लाग्छन् । कवितामा बनावटी केही छैनन् । सफा हृदयले जे छोएपनि त्यो सुन्दर देखिन्छ ।
कवि दीपाका कविताहरू तिनै सुन्दर मनको अभिव्यक्तिहरू हुन् । बिद्रोह वा क्रान्तिका कविता लेख्दापनि शालीन शैलीमा व्यक्त हुनु असाधारण कुरा हो ।’
कार्यक्रममा कुइनेटार धार्मिक तथा पर्र्यटन व्यवस्थापन समितिका उपाध्यक्ष केबी किरातले साहित्यलाई पर्यटनसँग जोडेर पुलको काम गर्नाले यस क्षेत्रको आन्तरिक पर्यटन प्रवद्र्वनमा टेवा पुग्ने विश्वास व्यक्त गरे ।
मिक्लाजुङ साहित्य समाजको आयोजनामा सम्पन्न भएको कार्यक्रममा समाजका अध्यक्ष कवि गगन योक्पाङदेनले आगामी दिनहरूमा समेत साहित्य र पर्यटनलाई एकसाथ लैजाने योजना रहेको सुनाए ।
खासगरी उत्तरी मोरङ मिक्लाजुङमा पछिल्लो समय कवि हेमन यात्रीले शिक्षा, साहित्य र पर्यटनलाई जोड्नका निम्ति सक्रियता देखाउँदै आएका छन् ।
उनले कवि पुनको यो कविता उत्सवले स्थानीय पर्यटन प्रवद्र्वनकोसमेत विकास हुने बताए । कवि यात्रीले यसअघि कवि, लेखहरूसँगको सहकार्यमा मिक्लाजुङमा यसअघि विद्यालयको स्तरोन्नतिमासमेत सक्रियता देखाएका थिए ।
Discussion about this post