इटहरी : सुनसरीमा वीपी सप्ताह सुरु भएको छ । नेपाली कांग्रेसका संस्थापक तथा जननायक विश्वेश्वरप्रसाद कोइराला (वीपी)को जन्मजयन्तीको अवसर पारेर सप्ताह कार्यक्रमको सुरु गरिएको हो ।
बुधबार (आज) सुनसरीको रामधुनी ५ स्थित झुम्का मिनी पार्कमा वृक्षारोपण गरी सप्ताहको उद्घाटन गरिएको हो । सुनसरी क्षेत्र नं. २ (क) ले आयोजना गरेको सप्ताह कार्यक्रमको उद्घाटन नेपाली कांग्रेसका केन्द्रीय सदस्य राजीव ढुंगानाले गरेका थिए । उनले वृक्ष रोप्दै कार्यक्रमको उद्घाटन गरे ।
कार्यक्रममा बोल्दै उनले कांग्रेस लोकतन्त्रका लागि लडेको भन्दै वीपी कोइरालाको जीवन हरेक व्यक्तिले अनुशरण गर्नुपर्ने बताए । ‘रूख रोप्नु भनेको पर्यावरण र पर्यटनको विकास पनि हो,’ ढुंगानाले भने, ‘रूख रोप्ने मात्रै होइन, यसको संरक्षण पनि गर्नुपर्छ ।
सभापति सुबेक्छु देवानकाअनुसार यस वर्ष दोस्रो संस्करणअनुसार ‘वीपी सप्ताह’ मनाइएको हो । उनकाअुनसार वीपी सप्ताह कार्यक्रमअनुरूप बुधबार वृक्षारोपणसहित सरसफाई कार्यक्रम आयोजना गरिएको उनले बताए ।
सरसफाईसँगै उक्त क्षेत्रमा डस्बिनहरू पनि राखिएको छ । वृक्षारोपणमा विभिन्न प्रजातीका एक सय एक वटा बिरूवा रोपिएको थियो ।
वीपीलाई कांग्रेसले मात्रै होइन, आम मानिसले अध्ययन गर्न आवश्यकता रहेको सभापति देवानले बताए । उनले भने, ‘वीपीलाई अध्ययन गर्ने मात्रै होइन, वीपीलाई बाँच्ने हो । हरेक मानिसले वीपीलाई पढ्नुपर्छ, राज्यले नै वीपीको विचारलाई टेकेर अगाडि बढ्न आवश्यक छ ।’
उनका अनुसार आगामी शनिबार (२२ गते) ‘कंग्रेस रन २०८१’ र २४ गते सोमबार वीपी साहित्य सन्ध्या कार्यक्रमको तयारी गरिएको छ ।
रनमा करिब पाँच सय सहभागी हुनेछन् भने महिला पुरुष दुवै समूहतर्फ विजेताहरूलाई पुरस्कार प्रदान गरिनेछ । यसैगरी साहित्य सन्ध्या कार्यक्रममा भने पाँचजना कविहरूले कविता वाचन गर्नेछन् भने वीपीको व्यक्तित्वमाथि बहस कार्यक्रम आयोजना हुनेछ ।
‘वीपीको साहित्य, राजनीति मात्रै नभइ व्यक्तित्वमाथि नै बहस हुनेछ,’ सभापति देवानले भने, ‘गत वर्ष पनि यही किसिमको आयोजना गरिएको थियो । सोही कार्यक्रमलाई निरन्तरता दिएका हौँ ।’
बुधबार उद्घाटन कार्यक्रममा कांग्रेस जिल्ला सचिव वीरेन्द्र साह, रामधुनी नगर सभापति सुदीप अधिकारी, इटहरी उपमहानगर उपसभापति बालकृष्ण विष्ट, रामधुनी ५ का वडाध्यक्ष भोला बास्तोला, कांग्रेस प्रदेश प्रतिनिधि विज्ञान राईलगायतले बोलेका थिए ।
Discussion about this post