विराटनगर : “पर्यटन न्याय र शान्ति” भन्ने सन्देशका साथ आज (शुक्रबार) विश्व पर्यटन दिवस मनाइँदै छ ।
भौगोलिक, सामाजिक, सांस्कृतिक तथा जैविक विविधताले भरिपूर्ण कोशी प्रदेश पर्यटकीय दृष्टिकोणले अत्यन्तै उर्वर प्रदेश रहेको मुख्यमन्त्री हिक्मत कार्कीले बताएका छन् ।
नेपालकै होचो क्षेत्र झापाको केचनाकवलदेखि विश्वको सर्वोच्च शिखर सगरमाथासहित १० अग्ला हिमालमध्ये ५ वटा कोशी प्रदेशमा रहनुले पनि पर्यटनको सम्भावना उच्च रहेको उनको भनाइ छ ।
मुख्यमन्त्री कार्कीले विश्वको मकालु, लोत्से, कञ्चनजंघा र कुम्भकर्ण हिमालले विश्वका पर्यटकहरूको ध्यान आकृष्ट गरेको बताए ।
पाथीभरा, बराहक्षेत्र र हलेसी, खुवालुङदेखि माङ्सेबुङ, फक्ताङ्लुङ, तुवाचुङ, जायजुङ जस्ता ऐतिहासिक र धार्मिक सम्पदाहरूले सामाजिक र धार्मिक विविधतालाई उजागर गरेको बताए ।
पर्यटन प्रर्वद्धन गरी हाम्रो राष्ट्रिय पूँजी विकास गरेर “संवृद्ध नेपाल, सुखी नेपाली”को राष्ट्रिय आकांक्षालाई पूरा गर्न सकिने उनले बताए । मुख्यमन्त्री कार्कीले पर्यटन प्रर्वद्धनका लागि कोशी प्रदेश सरकारले स्थापनाकाल देखि नै काम गरिरहेको बताउँदै प्रदेशको श्रोत र साधनले भ्याएसम्म पर्यटकीय गन्तव्यहरूको निर्माण गर्ने र प्रचार प्रसार गर्ने काम पनि सुरु गरेको छ ।
उनले संघीय सरकार र स्थानीय सरकारहरूसँगको समन्वय र सहकार्यमा प्रदेशको पर्यटनलाई अगाडि बढाउन चाहेको उल्लेख गर्दै पर्यटन प्रर्वद्धन निजी क्षेत्रको साझेदारी र हातेमालो बिना सम्भव नरहेको बताए । कोशी प्रदेशको संवृद्धिका लागि पर्यटन विकासमा अगाडि बढ्ने उनले प्रतिबद्धतासमेत व्यक्त गरे ।
Discussion about this post