इटहरी : कोशी प्रदेशमा नेपाली कांग्रेस र नेकपा (एमाले)बीच बनेको दुई दलीय संयन्त्रको बैठकले पहिचान पक्षधरसँग वार्ता गरी उपयुक्त निर्णय लिने तयारी गरेको छ ।
कांग्रेस–एमाले दलीय संयन्त्रका नेता, कोशी प्रदेश सरकारका मुख्यमन्त्री र मन्त्रीसहितको शुक्रबार बसेको बैठकले पहिचान पक्षधरसँग वार्ता गरी उपयुक्त निर्णय लिने तयारी गरेको हो ।
यसैगरी बैठकले चालु आर्थिक वर्षको बजेट संशोधन गर्नेसमेत निर्णय भएको छ । खासगरी २०८१–०८२ का लागि कोशीमा बजेट ल्याउँदा नेकपा (एमाले) र नेकपा (माओवादी केन्द्र)को सरकार रहेका कारण उक्त बजेटप्रति एमाले र कांग्रेस सांसद असन्तुष्ट थिए ।
सरकार फेरिएपनि आफैंले ल्याएको बजेट भएका कारण संशोधन गर्न मुख्यमन्त्री हिक्मतकुमार कार्की तयार थिएनन् । तर, शुक्रबारको बैठकबाट भने कार्कीले बजेट संशोधन गर्ने निष्कर्षमा पुगेका छन् ।
तत्कालीन प्रदेश १ को नामकरणविरूद्ध असन्तुष्ट रहेका आन्दोलनरत पक्षसँग वार्ता बसेर उपयुक्त निर्णय गर्ने तयारी भएको प्रदेश सरकारका प्रवक्ता भूपेन्द्र राईले बताए ।
उनका अनुसार ताप्लेजुङमा रहेको प्रसिद्ध धार्मिक स्थल पाथीभरामा केवलकार निर्माण सुरू भएपछि त्यहाँ पनि विरोधमा आन्दोलन सुरु भएको छ । दुवै आन्दोलनको नेतृत्व पहिचान पक्षधरहरूले गर्दै आएकाले वार्ताका लागि समिति बनाउन सुझाव आएको उनले बताए ।
नेकपा एमालेका स्थायी समितिका सदस्य शेरधन राईको अध्यक्षतामा बसेको बैठकमा मुख्यमन्त्री हिक्मतकुमार कार्की, पूर्व मुख्यमन्त्री एवम् नेपाली कांग्रेसका कोशी सभापति उद्दव थापासँगै मन्त्री तथा दुई दलीय संयन्त्रका सदस्यहरू सहभागी थिए ।
बैठकले प्रदेश सरकारको नीति कार्यक्रम र बजेटलाई थप प्रभावकारी बनाउन, मुख्यमन्त्री र मन्त्रीहरूले सरकारको नीति कार्यक्रम कार्यन्वयनमा विशेष ध्यान केन्द्रित गर्ने, बजेट संशोधनको तयारी सुरु गर्ने र दुई दलको सहमतिबाट विशेष प्राथमिकता प्राप्त र नागरिकको अत्यावश्यक मागहरूलाई आधार मानी कार्यन्वयनयोग्य कार्यक्रमहरूमा बजेटलाई केन्द्रित गर्ने विषयबारे छलफल भएको थियो ।
यसैगरी प्रदेश सरकारबाट सञ्चालित बहुवर्षीय वा अन्य प्रकृतिका आयोजनाहरूको सम्पन्न गर्नेगरी वर्गीकरण गरेर काम गर्ने, चुनौतीहरूलाई सामना गर्न नियमित छलफल, परामर्श र समीक्षा गर्दै अवसर र सम्भावनाहरूको अधिकतम उपयोग गर्ने, दुई दलीय संयन्त्रमार्फत केन्द्रबाट पहल गरी विभिन्न शीर्षकहरूमा थप बजेटका लागि पहल गर्नेबारे छलफल भएको प्रवक्ता राईले बताए ।
यसैगरी प्रदेश लगानी सम्मेलन, अन्तराष्ट्रिय चिया सम्मेलन र पर्यटन वर्ष महोत्सव लगायतको तयारी र व्यवस्थापन गर्ने, निजी क्षेत्र सबैलाई समेटने र भूमिका दिने, सम्मेलन र महोत्सवहरूलाई ऐतिहासिक र उपलब्धीमूलक बनाउनेबारे छलफल भएको थियो ।
यस्तै, नियमित सरकारले आन्तरिक रूपमा समीक्षा गर्ने, दुई दलीय संयन्त्र र सरकारबीचको छलफललाईसमेत नियमित गर्ने, प्रदेश सरकारले गरेका राम्रा कामहरूलाई जनस्तरमा पु¥याउने, प्रदेश सरकार मातहतका सहकारीहरूको बचत, लगानी र अपचलन लगायतको विषयहरूको अध्ययन गर्न समिति गठन गर्ने, एसिएन हाइवे निर्माणमा उत्पन्न अवरोध र कच्चा पदार्थ आपूर्ति लगायतमा उत्पन्न समस्या समाधानबारेमासमेत सम्बन्धित पक्षहरूसँग तत्काल संवाद गर्ने निर्णय भएको राईले बताए ।
उनका अनुासर अनेकन बहानामा सामाजिक सद्भाव र सहिष्णुता भड्किन र भड्काउन गरिने प्रयासहरूबारे सरकार र दुई दलीय संयन्त्र सचेत रहनेबारे छलफल भएको थियो ।
Discussion about this post