इटहरी : मोरङको सुन्दरहरैँचामा टिपरको ठक्करबाट एक पुरुषको मृत्यु भएको छ ।
सुन्दरहरैँचा नगरपालिका–१ को हरैँचा बजारमा विराटनगर–विराटचोक सडक खण्डअन्तर्गतको हरैँचा बजारमा ना १ क ६२७० नम्बरको टिपरले प्रदेश १–०२–०५३ प ७०१० नम्बरको मोटरसाइकललाई शुक्रबार बिहान १०ः५० बजेतिर ठक्कर दिएको थियो ।
प्रहरीका अनुसार टिपरको ठक्करबाट मोटरसाइकल चालक सुनसरीको दुहबी नगरपालिका–९ का ४० वर्षीय महमद हासिम मियाँको घटनास्थलमै मृत्यु भएको हो ।
दुर्घटनालगत्तै भेला भएको स्थानीयले अहिले विराटनगर–विराटचोक सडक खण्ड अवरुद्ध बनाएर प्रदर्शन गरेका छन् ।
जसकारण अहिले सो क्षेत्रमा तनाव उत्पन्न भएको छ । सडकमै शव राखेर प्रदर्शनमा उत्रिएको भीडले टिपरको तीव्र गतिका कारण दुर्घटना भएको बताएका छन् ।
घटनाबारे थप अनुसन्धान भइरहेको प्रहरीले जनाएको छ ।
Discussion about this post