इटहरी : सुनसरीको रामधुनी नगरपालिका ६ स्थितबाट लागूऔषध गाँजा बोकेको भारतीय नम्बरको एम्बुलेन्स प्रहरीले नियन्त्रणमा लिएको छ ।
भारतीय नम्बरको एम्बुलेन्सको प्रयोग गरी लागूऔषध गाँजा ओसारपसार भइरहेको भन्ने विशेष सूचनाको आधारमा इलाका प्रहरी कार्यालय इटहरी, धरान, पकली र रामधुनीबाट परिचालन भएको प्रहरी टोलीले लोकमार्ग तथा भित्री सडक खण्डहरूमा सवारी साधनहरू चेकजाँच गर्ने क्रममा नियन्त्रणमा लिइएको हो ।
सुनसरी प्रहरीका अनुसार रामधुनी ६ पिडारी स्थितबाट बीआर ३८ पी ५४१० नम्बरको एम्बुलेन्समा ६ वटा बोरामा लुकाईछिपाई ल्याउँदै गरेको एक सय ८० किलोग्राम गाँजा बरामद गरेको हो ।
गाँजा बरामद भएसँगै एम्बुलेन्स चालक बराहक्षेत्र नगरपालिका ४ का २५ वर्षीय श्रीराज कुमार साहलाई नियन्त्रणमा लिइएको छ ।
पक्राउ परेका साहलाई इलाका प्रहरी कार्यालय पकलीमा राखेर आवश्यक कारबाही तथा अनुसनधान भइरहेको सुनसरी प्रहरीले जनाएको छ ।
Discussion about this post